AQShning Jorjiya shtatida Ebbi Nelson ismli ayol o‘zining Sueyzi laqabli besh yoshli mushugi bilan yashaydi. Mushukning Instagram’dagi sahifasida 32 mingdan ortiq obunachisi bor, bunga uning juda kattaligi sabab bo‘lgan — uy hayvonining og‘irligi 7,5 kilogrammni tashkil etadi, deb yozadi Motor.

Foto: Instagram / Swayzebegs

Nelson nima sababdan mushugi bu qadar semizligini tushuna olmayapti, veterinarlar esa uning mutlaq sog‘lom ekanligini ta’kidlamoqda. Sueyzi Nelsonning boshqa mushuklariga qaraganda ikki barobar kamroq ovqatlansa-da, ozmayapti. Egasining aytishicha, maxsus diyeta ham mushukka yordam bermagan: Sueyzi uning yordamida bir kilogrammdan ortiq vazn tashlagan, xolos.

“Uning ovqatini cheklaganim sabab biroz ozdi, ammo baribir vazni 7,5 kilogramm. Unga kuniga ikki marta namlantirilgan ovqatini yarim bankadan beraman, ba’zida 1/8 stakan quruq yegulik”, — deydi mushuk egasi.

Sueyzi doim ham bu qadar semiz bo‘lmagan. To‘rt oyligida u boshqa mushuklar kabi bo‘lgan. Hozirda u boshqa mushuklardan g‘alati harakati bilan ajralib turadi — deyarli har kuni nimanidir tutishga uringani kabi old panjalarini ko‘tarib turadi. Bu harakatni u muntazam takrorlab kelmoqda.

Avvalroq bengal mushugi rosa “gapirishga uringani”, lekin bunga jur’at qila olmagani, Yaponiyada bir insonning hayotini saqlab qolgan mushuk bir kunga politsiya boshlig‘i etib tayinlangani, Turkiyada uysiz mushuk kasal bolalarini shifoxonaga olib borgani to‘g‘risida xabar berilgandi.