Amerikaning o‘yinchoq mashinalar ishlab chiqarishga ixtisoslashgan Hot Wheels kompaniyasi Tesla Cybertruck modeli hamda Cyberquad kvadrosikli, shuningdek, pikapni boshqarish uchun rul-joystikka ega jamlanmani taqdim etdi. Narxi 100 dollar bo‘lgan butun jamlanma xaridorlarni o‘ziga jalb etishi kerak, deb xabar beradi Motor.
Hot Wheels’ning o‘yinchoq Cybertruck pikapi kompaniya o‘tgan yili anons qilgani cheklangan model kabi 1:10 masshtabda yaratilgan. Unga kvadrosikl qo‘shib berilishi, buning natijasida jamlanma narxi to‘rt barobar qimmatlashganiga qaramay, modellar tezda sotilib ketgandi.
Endilikda Hot Wheels elektropikapning yangi versiyasini yaratdi. Kompaniya saytida ko‘rsatilishicha, o‘yinchoq Cybertruck’ning maksimal tezligi soatiga 19,3 kilometrga yetadi — bu 400 dollarli model ko‘rsatkichidan qariyb ikki barobarga kam. Bundan tashqari, pikapning faqat orqa g‘ildiraklari aylanadi, kuzovi ham detallar bilan boyitilmagan.
Mazkur modelning o‘ziga xos jihatlari — ishlaydigan optika, haqiqiy Cybertruck ruli shaklidagi original joystik va 1:10 masshtabda yaratilgan Cyberquad kvadrosikli. Kvadrosikl pikapdan farqli o‘laroq, radioboshqarilmaydi. Cybertruck akkumulyatorlar bilan jihozlanmagan, uch soat quvvatlantirish uning taxminan 25 daqiqa harakatlanishini ta’minlaydi.
Avvalroq amerikalik bloger Tesla Cyberquad elektro-kvadrosiklining aniq nusxasini yaratgani, yana bir bloger esa Tesla Cybertruck chindan ham o‘q o‘tkazmasligini sinab ko‘rgani to‘g‘risida xabar berilgandi.
Izoh (0)