UFC 262 musobaqasi Toshkent vaqti bilan 16-may, yakshanba kuni AQShning Xyuston shahrida (Texas shtati) bo‘lib o‘tdi.

Foto: UFC

Yengil vazn toifasi vakillari Toni Fergyuson hamda Beneil Dariush o‘rtasidagi jang to‘liq 3 raund davom etdi. Unda Dariush hakamlarning yakdil qaroriga ko‘ra g‘alabani o‘ziniki qildi. Shu tariqa Fergyuson UFC’da ketma-ket 3-jangini ham mag‘lubiyat bilan yakunladi. Avvalroq Toni Charlz Oliveyra hamda Jastin Getjiga ham yutqazgandi.

Musobaqaning asosiy jangi UFC’ning yengil vaznda Habib Nurmagomedovdan so‘ng vakant turgan chempionlik kamari uchun o‘tkazildi. Unda Charlz Oliveyra va Maykl Chendler o‘zaro to‘qnash keldi. Jangning 1-raundi Chendlerning ustunligida o‘tdi. 2-raund avvalida esa Oliveyra kutilmaganda kuchli zarbalari bilan Chendlerni muvozanatdan chiqardi va texnik nokaut evaziga g‘alabani qo‘lga kiritdi. Natijada Oliveyra UFC yengil vazn toifasi chempioniga aylandi.

UFC 262 musobaqasining barcha janglarini bu yerda tomosha qilish mumkin — video.

UFC 262 musobaqasi natijalari

Asosiy kard:

Charlz Oliveyra 2-raundda Maykl Chendlerni texnik nokuatga uchratdi.

Beneil Dariush hakamlarning yakdil qaroriga ko‘ra (30-27, 30-27, 30-27) Toni Fergyusonni taslim qildi.

Rojeriu Bontorin Mett Shnelni hakamlar qaroriga ko‘ra mag‘lub etdi.

Ketlin Chukagyan hakamlar qaroriga ko‘ra Vivian Araujudan ustun keldi.

Edson Barboza 3-raundda Sheyn Burgosni nokautga uchratdi.

Prelim kard:

Andre Muniz 1-raundda bo‘g‘ish usuli bilan Ronaldu Souzani mag‘lub qildi.

Lando Vannata hakamlar qaroriga ko‘ra Mayk Grandini taslim etdi.

Jordan Rayt 1-raundda Jeymi Pikettni texnik nokautga uchratdi.

Andrea Li 2-raundda Antonina Shevchenkoni taslim etdi.

Taker Luts hakamlar qaroriga ko‘ra Kevin Agilarni yutdi.

Pristsila Kashueyra 2-raundda Jina Mazanini texnik nokautga uchratdi.

Kristos Giagos 2-raundda Shon Sorianodan ustun keldi.