Italiya A Seriyaning 36-turidan o‘rin olgan qator o‘yinlar 12-may kuni o‘tkazildi.
“Jenoa” ushbu turda “Bolonya” maydonida mehmon bo‘lib, ishonchli g‘alabani qo‘lga kiritdi (2:0). Bu orqali Davide Ballardini shogirdlari A Seriya jon saqlab qolish vazifasini uddaladi.
Mavsum tugashiga ikkita tur qolganda “grifonlar” 39 ochko bilan 14-o‘rinda bormoqda va “xavfli hudud”dan 8 ochkoga ilgarilab ketdi. Avvalroq “Krotone” va “Parma” B Seriyaga ravona bo‘lishi ma’lum bo‘lgandi.
Italiya chempionatida bosh sovrin egasi ma’lum bo‘lgan, biroq Chempionlar Ligasiga yo‘llanma beruvchi keyingi uch o‘rin uchun to‘rtta jamoa kurash olib bormoqda. “Atalanta” va “Milan” 75 ochko bilan kuchli uchlikka kirgan, “Napoli” 73 ochko bilan 4-o‘rinni band qilib turibdi. “Yuventus” esa neapolliklardan bir ochko kam to‘plagan.
A Seriyaning keyingi tur o‘yinlari 15 va 16-may kunlari bo‘lib o‘tadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)