Turkiya 15-maydan boshlab 16 ta mamlakatdan kelgan sayyohlar uchun koronavirusga test topshirish majburiyatini bekor qiladi

Turkiya 15-maydan boshlab 16 ta mamlakatdan kelgan sayyohlar uchun koronavirusga qarshi PZR-testini topshirish majburiyatini bekor qiladi. Bu haqda mamlakat sog‘liqni saqlash vazirligiga tayanib, “Interfaks” xabar berdi.

“Sog‘liqni saqlash vazirligi Ichki ishlar vazirligiga 16 ta davlat fuqarolari uchun 15-maydan boshlab Turkiyaga kirishda manfiy PZR-testi natijalarini taqdim etish majburiyatini bekor qilishni ko‘zda tutuvchi xat yubordi. Bu mamlakatlar qatoriga Xitoy, shu jumladan, Gonkong va Tayvan, Vyetnam, Avstraliya, Yangi Zelandiya, Singapur, Tailand, Janubiy Koreya, Isroil, Yaponiya, Buyuk Britaniya, Latviya, Lyuksemburg, Ukraina va Estoniya kiritildi”, — deyiladi xabarda.

Turkiya hukumati 2021-yilning boshida mamlakatga kirishda manfiy PZR-test natijalarini taqdim etish majburiyatini joriy qilgan edi. Avval ushbu talab mart oyining oxirigacha amal qilishi belgilandi, lekin keyinroq bu tartibning amal qilish muddati 26-maygacha uzaytirildi.

Ma’lumot uchun, koronavirus bilan kasallanish darajasining keskin o‘sishi sababli Rossiya 15-apreldan 1-iyungacha Turkiya bilan aviaqatnovlarni cheklab qo‘ygan edi. 17-mayga qadar mamlakatda qat’iy karantin joriy qilindi, buning natijasida epidemiologik vaziyat yaxshilana boshladi.

Bungacha Turkiya hukumati mamlakatda koronavirus tarqalishining kuchayishi fonida 23–25-​​aprel kunlari to‘liq komendantlik soati o‘rnatgan edi.

Avvalroq O‘zbekiston Prezidenti Shavkat Mirziyoyevning topshirig‘iga muvofiq, 2021-yil 2-may kuni Turkiyaga koronavirus infeksiyasi tarqalishini bartaraf etish uchun zarur bo‘lgan tibbiy buyumlardan iborat insonparvarlik yordami yuborilgani haqida xabar berilgandi.