Falastin rahbari Iordaniya qiroli va Iroq prezidenti bilan mintaqadagi vaziyatni muhokama qildi

Falastin rahbari Mahmud Abbos 12-may kuni Iordaniya qiroli Abdulloh II va Iroq prezidenti Barham Solih bilan telefon orqali muloqot o‘tkazdi. Suhbat davomida u Falastin—Isroil mojarosining kuchayishini va umuman, mintaqadagi vaziyatni muhokama qildi. Bu haqda Mahmud Abbosning devonxonasiga tayanib “TASS” xabar berdi.

Suhbat davomida Falastin rahbari va Iordaniya qiroli “muborak Al-Aqsa masjidi, shuningdek, Sharqiy Quddusdagi ‘Shayx Jarrah’ hududidagi dindorlarning huquqlariga qarshi (Isroil) bosqinchi kuchlarning jinoiy va tajovuzkor harakatlarini muhokama qildi”.

Bundan tashqari, tomonlar “Isroilning xavfli eskalatsiyasi va G‘azo sektoriga hujumi” haqida gaplashdi. Har ikki rahbar “maslahatlashuvlarni davom ettirish va Isroilning Falastin xalqiga qilayotgan tajovuziga qarshi harakatlarni muvofiqlashtirish”ga kelishib oldi.

O‘z navbatida, Iroq prezidenti Falastin yetakchisi bilan suhbat chog‘ida “iroqliklar falastinliklarni qo‘llab-quvvatlashi va ularning huquqlarini tan olishini tasdiqladi”. Bunga javoban Falastin rahbari Solihga Bag‘dodning Falastin—Isroil mojarosidagi pozitsiyasi uchun minnatdorchilik bildirdi.

Ma’lumot uchun, Checheniston rahbari Ramzan Qodirov Isroil politsiyasining Ramazon oyida bu harakatlarini tanqid qildi va “kerak bo‘lsa, al-Aqsoni qutqarish va o‘z e’tiqodi uchun jonini ayamasligi”ni ta’kidladi.

Avvalroq Quddusning Ma’bad tog‘idagi al-Aqso masjidida Isroil politsiyasi bilan yuzaga kelgan to‘qnashuvda 278 nafar falastinlik jarohatlandi.

G‘azo sektoridan Isroil hududi bo‘ylab 11-may kuni tunda 200 ga yaqin raketa uchirildi. Harbiylarning ma’lumotlariga ko‘ra, “Temir gumbaz” raketaga qarshi mudofaa tizimi o‘nlab raketalarni to‘xtatib qoldi.