Buyuk Britaniyada mamlakat bosh vaziri Boris Jonsonning 2019-yilning dekabr oyi oxiridan 2020-yilning yanvar oyi boshigacha Karib dengizining Myustik orolida o‘tkazgan ta’tilining moliyalashtirish manbalari tekshirilmoqda. Buyuk Britaniya parlamentining Me’yorlar bo‘yicha komissari Ketrin Stoun tegishli tergov boshlangani haqidagi ma’lumotni tasdiqladi, deb yozmoqda “Korrespondent.net”.
Hukumat rahbariga qarshi tekshiruv boshlangani haqida matbuotda 2020-yildayoq xabarlar paydo bo‘lgan edi, lekin ular faqat 2021-yilning 10-may kuni rasmiy ravishda qonun chiqaruvchi organning saytida tasdiqlandi.
2019-yil 12-dekabrda bo‘lib o‘tgan parlament saylovlarida g‘alaba qozonganidan ko‘p o‘tmay, Yangi yil arafasida Jonson va uning qallig‘i Kerri Simondsning 15 ming funt sterlingga (20 ming dollar) baholangan sayohati bilan bog‘liq mojaro ta’til xarajatlari qanday to‘langani masalasidagi noaniqlik tufayli yuzaga kelgan. Bosh vazir orolga sayohat xarajatlarini hukmron Konservativ partiyaning donori, Buyuk Britaniyadagi Yevropaning eng yirik uyali telefon sotuvchisi bo‘lgan Carphone Warehouse kompaniyasi kengashining sobiq muovini Devid Ross to‘laganini ma’lum qilgan. Keyinchalik o‘z navbatida Ross bu ma’lumotlarni rad etib, Jonson va uning hamrohi uchun ta’til xarajatlarini to‘lamagani, ularning faqatgina orolda yashashini tashkillashtirishda yordam berganini ta’kidlagan.
Ushbu tergov muxolifatdagi Leyboristlar partiyasi deputatlarining murojaatidan so‘ng uyushtirilgan, ular deputatlarning Axloq kodeksi parlament a’zolaridan xayriya qilgan shaxs yoki tashkilot nomini aytishi talab etilishini ta’kidlab o‘tgan. Ushbu tartib Buyuk Britaniyada amaldagi qonunlarga binoan parlament a’zosi bo‘lishga majbur bo‘lgan bosh vazirga ham tegishli hisoblanadi.
Agar Ketrin Stoun Jonson kodeks qoidalarini buzgan, degan xulosaga kelsa, u holda uning yozma ravishda uzr so‘rashini talab qilishga haqli bo‘ladi. Shuningdek, Stoun bosh vazirning qoidabuzarligini juda jiddiy deb hisoblasa, ishni to‘g‘ridan to‘g‘ri Jonsonni ish haqining bir qismidan mahrum qilish kabi qattiqroq jazoga hukm qilishi mumkin bo‘lgan parlament me’yorlari qo‘mitasiga yuboradi. Buyuk Britaniyadagi OAVning yozishicha, bunday choraning qo‘llanishi hukumat rahbarining obro‘siga jiddiy zarar yetkazishi mumkin.
Ma’lumot uchun, ta’til mojarosi Jonsonga qarshi olib borilayotgan ikkinchi tergov bo‘lib, 28-aprel kuni Buyuk Britaniyaning Saylov komissiyasi bosh vazir qarorgohi ta’mirlanishining moliyalashtirilishi bilan bog‘liq holatlar bo‘yicha tekshiruv boshlaganini ma’lum qildi.
Avvalroq Buyuk Britaniya bosh vaziri Boris Jonson Oksfordshir grafligida joylashgan kottejini ijaraga bermoqchi ekanini ma’lum qildi. Kottejning umumiy maydoni yonma-yon qurilgan bino bilan birgalikda 288,5 kvadrat metrni tashkil etadi, uy mebellarsiz ijaraga beriladi. Uy hayvonlarini xonadonda parvarish qilishga ham uy egalari bilan kelishgan holda ruxsat olinadi. E’lon bo‘yicha uyning haftalik ijarasi — 981 funt sterling (oyiga 4,25 ming funt).
2019-yilda Jonson o‘zi va rafiqasiga tegishli XIX asrga oid Londondagi taunxausni sotib yuborgandi. Buyuk Britaniya bosh vaziri mazkur obyekt sotuvidan 3,7 million AQSh dollari miqdorida daromad olgan.
Mavzuga doir:
Izoh (0)