AQSh Qirg‘iziston va Tojikistonga chegara mojarosini hal qilishda istalgan tarzda yordam berishni taklif qilmoqda. Bu haqda 10-may, dushanba kuni AQSh davlat kotibining Janubiy va Markaziy Osiyo masalalari bo‘yicha yordamchisi o‘rinbosari Jonatan Xenik aytib o‘tdi, deb yozadi “TASS”.
Foto: AP Photo
Vashingtondagi Atlantika kengashi tomonidan o‘tkazilgan onlayn-seminarda Xenik Tojikiston va Qirg‘iziston o‘rtasida voqealar rivojidagi oxirgi o‘zgarishlardan AQSh ruhlanganini ta’kidladi.
“Biroq biz vaziyat o‘z yechimini topgan, deb o‘ylay olmaymiz. Muammo hali bartaraf qilinmagan. Aholining uylariga qaytishi va mojaro zonasida qayta qurish ishlarini boshlashga sharoit yaratish uchun tinchlik va barqarorlik kerak bo‘ladi”, — dedi AQSh rasmiysi.
“Biz ikkala mamlakat rahbarlari bilan Bishkek va Dushanbedagi elchixonalarimiz orqali to‘g‘ridan to‘g‘ri aloqadamiz. Ularning Vashingtondagi elchixonalari bilan ham bog‘landik. Biz nizoni tinch yo‘l bilan hal qilishni har qanday tarzda qo‘llab-quvvatlashimizni aytdik”, — deya ta’kidladi Xenik.
“Bundan ham muhimi Bishkek va Dushanbedagi rahbariyatlarning mas’uliyatni o‘z zimmasiga olishga, bu kabi hodisa takrorlanmasligi uchun sharoit yaratib berishga astoydil chaqirdik”, — dedi AQSh rasmiysi.
Avvalroq Rossiya prezidenti Vladimir Putin Qirg‘iziston va Tojikiston o‘rtasidagi ziddiyatli vaziyatni hal qilishda vositachi sifatida ishtirok etishga tayyorligini aytgandi.
Shuningdek, BMT, Yevroittifoq, Xitoy, O‘zbekiston, Qozog‘iston ham mojaroga o‘z munosabatini bildirib, ikki mamlakatni o‘zaro nizolarni tinchlik bilan hal qilishga chaqirgan.
Qirg‘iziston va Tojikiston chegarasidagi nizo 28-aprel kuni mahalliy aholi o‘rtasidagi janjal bilan boshlangan edi. U esa tojikistonlik harbiylar bahsli hududda joylashgan “Golovnoy” suv taqsimlash punkti yaqinidagi elektr ustuniga videokuzatuv kameralarini o‘rnatganidan keyin kelib chiqqan. Qirg‘iziston chegara xizmatining axboroti bo‘yicha 29-aprelda ikki davlat harbiylari o‘rtasida otishma sodir bo‘lgan. Idora tojik tomonining minomyot hisob-kitob pozitsiyalarini egallashni tashkillashtirayotganini qayd etgan.
