Qirg‘iziston prezidenti Sadir Japarov Marat Imankulovni Xavfsizlik kengashining yangi kotibi etib tayinladi, deb yozmoqda “TASS”.
“Prezident Sadir Japarov Imankulovni Qirg‘iziston respublikasining Xavfsizlik kengashi kotibi etib tayinlashni ko‘zda tutuvchi farmonni imzoladi”, — deyiladi xabarda.
Matbuot xizmatining xabariga ko‘ra, 8-may kuni mamlakat prezidenti yana bir farmon bilan Xavfsizlik kengashining sobiq kotibi Riskeldi Musayevni vazifasidan ozod qildi.
Rasmiy ma’lumotlarga ko‘ra, shu paytgacha Imankulov ShHT Mintaqaviy aksilterror tuzilmasining kengashida Qirg‘iziston vakili bo‘lgan. 2007—2010-yillarda u MDHning Terrorizmga qarshi kurash markazi rahbarining o‘rinbosari lavozimida faoliyat yuritgan. 2010-yil to‘rt oy davomida Qirg‘iziston Xavfsizlik kengashining kotibi vazifasini bajargan.
Avvalroq Japarov qozog‘istonlik tadbirkor va sanoatchi Almaz Ibragimovni o‘zining ko‘ngilli maslahatchisi etib tayinlagan edi. Almaz Ibragimov Qirg‘izistonning Issiqko‘l viloyatida tug‘ilgan, uzoq yillar davomida u Qozog‘istondagi yirik sanoat korxonalarining top-menejeri bo‘lgan.
Shuningdek, prezident aprel oyidagi referendum natijalari bo‘yicha qabul qilingan tuzatishlarni inobatga olgan holda mamlakat konstitutsiyasining yangi tahririni imzoladi va yangi konstitutsiya 1-iyuldan kuchga kirishi mumkinligini aytdi.
Shundan keyin, Japarov davlat va hukumat tarkibini prezident ma’muriyatiga qayta o‘zgartirish bo‘yicha farmonni imzoladi. Bundan buyon Vazirlar Mahkamasining tuzilmasi va uning faoliyati bo‘yicha javobgarlikni prezident o‘z zimmasiga oladi, prezident ma’muriyatining rahbari esa Vazirlar Mahkamasini boshqaradi. Hujjat parlament a’zolari sonini 120 tadan 90 tagacha kamaytirishni nazarda tutadi.
Izoh (0)