Qirg‘izistonda prezident ma’muriyati tashkil etildi

Qirg‘iziston rahbari Sadir Japarov davlat va hukumat tarkibini prezident ma’muriyatiga qayta o‘zgartirish bo‘yicha farmonni imzoladi. Bu haqda prezident matbuot xizmatiga tayanib, “RIA Novosti” xabar berdi.

“Davlat rahbari Sadir Japarov 2021-yil 11-aprelda bo‘lib o‘tgan referendumda (ommaviy ovoz berish) qabul qilingan Qirg‘iziston respublikasi konstitutsiyasiga muvofiq, avvalgi prezident va hukumat idoralari asosida prezident ma’muriyatini tuzishni ko‘zda tutuvchi farmonni imzoladi”, — dedi prezident matbuot xizmatining vakili.

Uning so‘zlariga ko‘ra, prezident apparatining sobiq rahbari Suyunbek Kasmambetov ma’muriyat rahbari etib tayinlandi.

5-may kuni Qirg‘iziston prezidenti Sadir Japarov aprel oyidagi referendum natijalari bo‘yicha qabul qilingan tuzatishlarni inobatga olgan holda mamlakat konstitutsiyasining yangi tahririni imzoladi. Yangi konstitutsiya Xalq qurultoyi (kengashi) institutini ijtimoiy rivojlanish yo‘nalishlari bo‘yicha tavsiyalar beradigan konsultativ, kuzatuv yig‘ilishi sifatida joriy etdi. Shuningdek, prezident va hukumat institutlari qayta shakllantirildi. Bundan buyon Vazirlar Mahkamasining tuzilmasi va uning faoliyati bo‘yicha javobgarlikni prezident o‘z zimmasiga oladi, prezident ma’muriyatining rahbari esa Vazirlar Mahkamasini boshqaradi. Hujjat parlament a’zolari sonini 120 tadan 90 tagacha kamaytirishni nazarda tutadi.

Sadir Japarov mamlakat xalqiga murojaat qilar ekan, Qirg‘iziston iqtisodiyoti so‘nggi yillardagi eng jiddiy inqirozga yuz tutayotganini ma’lum qildi.

Aslida, taklif etilayotgan yangiliklar boshqaruvning parlament-prezidentlik shaklidan prezidentlik shakliga o‘tishini anglatadi. 2021-yilning 10-yanvar kuni bo‘lib o‘tgan referendumda mamlakatning 80 foizga yaqin aholisi shu shaklni yoqlab ovoz bergan edi.