Hukumat tomonidan taklif etilgan soliq islohotlari tufayli Kolumbiya shaharlarida yuzaga kelgan ommaviy norozilik namoyishlarida to‘qqiz kun ichida 379 nafar fuqaro bedarak yo‘qoldi. Bu haqda Movice Davlat jinoyati qurbonlari milliy harakati ma’lumotlariga tayanib, “Kommersant” xabar berdi.
“Majburiy garovga olish bo‘yicha ishchi guruh tashkilotlari bedarak yo‘qolganlarni izlash bo‘limiga va Kolumbiya ombudsmani idorasiga 28-aprel kuni, namoyishlar boshlanganidan to hozirgacha bedarak yo‘qolgan 379 kishi haqida ma’lumotlar yubordi”, — deb yozdi tashkilot o‘zining Twitter sahifasida.
Soliq islohotlari loyihasi QQS (qo‘shilgan qiymat solig‘i) qo‘llashni kengaytirish, qo‘shimcha yig‘imlarni, aholi uchun yangi soliqlarni joriy etib, budjetni qo‘shimcha 6,8 milliard dollarga (taxminan yalpi ichki mahsulotning 2 foizi) to‘ldirishni nazarda tutgan edi. Norozilik namoyishlari boshlangach prezident Ivan Duke islohotlar matnini qayta ishlab chiqishni buyurdi. Namoyishlar paytida eng kamida 19 kishi vafot etdi, 800 dan ortiq fuqaro jabrlandi. 6-may kuni namoyishchilar Kongressning quyi va yuqori palatalari joylashgan Kapitoliy binosiga bostirib kirishga urindi.
Avvalroq Kolumbiya prezidenti Ivan Duke soliq islohotiga qarshi norozilik namoyishlari bo‘lib o‘tayotgan shaharlarga yordam uchun armiya yuborishini e’lon qilgan edi.
Mavzuga doir:
- Rio-de-Janeyroda politsiya operatsiyasi chog‘ida 25 kishi halok bo‘ldi (foto va video)
- Myanmada sun’iy yo‘ldosh antennalaridan foydalanish taqiqlandi. Qonunbuzarlarga bir yillik qamoq jazosi tayinlanadi
- Lukashenko noroziliklarni qo‘llab-quvvatlagani uchun 80 nafar sobiq harbiylar va kuchishlatar tizimning sobiq xodimlarini lavozimlardan mahrum qildi
Izoh (0)