6-may kuni soat 20:40 lar atrofida Samarqand viloyati hududidan o‘tuvchi xalqaro yo‘lning bir qismi magistral suv quvurining yorilib ketishi oqibatida o‘pirilib tushdi. Bu haqda Telegram’dagi “Samarqandliklar” kanali xabar berdi.
Ma’lum qilinishicha, M39 Olmaota—Toshkent—Termiz xalqaro avtomobil yo‘lining 1081-kilometrida, yo‘lning tagidan o‘tgan 1200 millimetrli yuqori bosimli magistral suv quvuri yorilib ketgan. Oqibatda katta miqdorda suv sizib chiqib, yo‘lning chap tomonidan 15x6 metr qismi o‘pirilib tushgan. Yana bir qismi esa cho‘kkan.
Shundan so‘ng viloyat IIB YHXB xodimlari tomonidan joydagi aylanma atrofida, yo‘l qoplamasi cho‘kkan va o‘pirilib tushgan tomonda transport vositalarining harakati to‘xtatilgan va yo‘lning ikkinchi tomonidan qatnov tashkil etilgan.
Qayd etilishicha, hodisada hech kim jarohat olmagan. Ayni damda yo‘lning o‘pirilgan qismi tegishli tashkilotlar tomonidan ta’mirlanmoqda.
Eslatib o‘tamiz, 2021-yilning martida Sirdaryo viloyatida kuzatilgan kuchli yog‘ingarchilik oqibatida yo‘l o‘tkazgichlardan biriga shikast yetgan, ayrim tumanlardagi ko‘chalarni suv bosgandi.
Izoh (0)