Beshta kamera, 200 karra zum va 4800 mA/soat akkumulyator. Huawei P50 Pro plyusning batafsil va sifatli renderi paydo bo‘ldi

Internetda yangi P50 lineykasiga boshchilik qiladigan model — Huawei P50 Pro+ smartfonining hozirga qadar eng sifatli renderi paydo bo‘ldi, deb xabar beradi IXBT.

Surat orqali qurilmaning ancha batafsil tavsifi, jumladan, asosiy kameralari soni bilan tanishish mumkin.

Smartfon mish-mishlarga mos tarzda ko‘rinish olgan — markaziy qismida frontal kamera uchun qirqim va minimal darajadagi hoshiyali egilgan displey. Asosiy kamera bloki Nova 8 yoki Nova 8 Pro’ni yodga soladi, ammo mazkur holatda ular ikkita “yumaloq qavatga” aniq ajratilgan. Yuqori qismi 1/1,18 dyuymli optik formatga ega Sony IMX707Y datchiklariga, keng burchakli obyektivga ega OmniVision OV64A’ga hamda besh karra optik zumni ta’minlaydigan RYYB teleobyektiviga ajratilgan.

Pastki qismida 10 karrali optik zumga ega periskop modul hamda 3D ToF kamerasi o‘rin olgan. Ayni vaqtda flagman model uchun ham bu haddan ortiq jamlanma hisoblanadi. Masalan, Xiaomi Mi 11 Ultra uchta kamera moduli bilan kifoyalangan. Huawei P50 Pro+ kamerasi 200 karrali gibrid yaqinlashtirishni ta’minlay oladi.

Shuningdek, smartfon HarmonyOS 2.0 operatsion tizimiga, 120 gertsli yangilanish chastotasiga ega 6,7 dyuymli ekran, 16 gigabayt tezkor va 512 gigabayt ichki xotiraga ega bo‘ladi. Qurilma chang va namlikdan IP68 standarti bo‘yicha himoyalangan, akkumulyator sig‘imi — 4800 mA/soat. Bir kristalli tizim sifatida Kirin 9000’dan foydalanilgan.