Reaktiv kostyumlarni yaratish bilan shug‘ullanuvchi Gravity Industries kompaniyasi Buyuk Britaniya Qirollik dengiz kuchlari bilan hamkorlikda sinov o‘tkazdi, deb xabar beradi Meduza.
Sinov vaqtida reaktiv kostyumdagi uchuvchi kater bortidan havoga ko‘tarilib, qirg‘oq xavfsizligi xizmatining harakatlanayotgan kemasiga borib qo‘ngan. Bu xuddi “Temir odam” filmidagi Toni Starkning parvoziga o‘xshaydi.
Parvozning to‘liq videosi bilan quyidagi havola orqali tanishish mumkin.
https://www.instagram.com/p/COW7dUxnGMy/
Gravity Industries kompaniyasining ma’lum qilishicha, dengiz piyodasi, shuningdek, kemaga vertolyot yordamida ham qo‘na oladi, biroq reaktiv kostyum buni tezroq amalga oshirish, kemaning istalgan qismiga mustaqil qo‘nish imkonini beradi.
https://www.instagram.com/p/COaefDInvxj/
Gravity Industries kompaniyasiga 2017-yilda britaniyalik Richard Brauning tomonidan asos solingan. Bunga qadar u neft sohasida faoliyat yuritgan va Qirollik dengiz piyodalari zaxirasida bo‘lgan. Gravity Industries reaktiv kostyumi prototipi ustida Richardning o‘zi olti oy ishlab, yaratgan.
Kostyum to‘rtta reaktiv dvigateldan iborat bo‘lib, uchuvchining qo‘l qismiga qotiriladi, yana bitta dvigatel uning orqasida joylashadi. Hozirda bu kabi kostyum narxi 400 ming dollardan qimmatroq bo‘lgani sabab kompaniya uni o‘zini “Temir odam”dek his qilishni istagan insonlarga ijaraga bermoqda.
2020-yilda Gravity Industries Shimoliy Angliya Sanitar aviatsiya xizmati bilan birgalikda sinovlar o‘tkazgan edi. Qutqaruvchilar tog‘dagi jabrlanuvchining oldiga yetib borishi kerak bo‘lgan. Sinov tashkilotchilarining ma’lum qilishicha, reaktiv kostyum yo‘lni 25 daqiqadan 1,5 daqiqagacha qisqartirish imkonini bergan.
Izoh (0)