Italiya kompaniyalaridan biri Rim Kolizeyining ichida yangi sahna qurish bo‘yicha o‘tkazilgan tenderda g‘olib chiqdi. Endilikda tomoshabinlar qachonlardir gladiatorlar janglari o‘tkazilgan arenaning markaziga tushishi mumkin bo‘ladi, deb yozmoqda The Guardian.

Foto: EPA

Sahnanning pol qismi harakatlanuvchi bo‘lishi rejalashtirilgan, uning ostiga lyuklar va yashirin liftlar joylashtiriladi. Mobil qurilish tizimi sababli quyida joylashgan yerosti inshootlari yomg‘irdan himoyalanadi. Ularni shamollatish, zarurat tug‘ilganda, sahnani ko‘chirish imkoniyati bo‘ladi.

Qurilish uchun tenderda tuzilmalar dizayni va arxitekturasi bilan shug‘ullanuvchi Milan Ingegneria kompaniyasi g‘olib bo‘ldi. Qurilish loyihasining budjeti 18,5 million yevroni tashkil etadi. Loyiha ikki yil ichida qurib bitirilishi kerak.

Italiya madaniyat vaziri Dario Francheskini bunday sahnaning 1800-yillargacha ham mavjud bo‘lgani, lekin keyinchalik u Kolizeyning yer ostida olib borilgan arxeologik qazish ishlari sababli olib tashlanganini aytdi.

“2023-yilda biz Kolizeyni yana muhtasham sahnasi bilan ko‘ramiz”, — deb ta’kidladi u.

2014-yilda arxeolog Daniel Manakordnoy Kolizeyni qayta tiklash tashabbusi bilan chiqdi, Francheskini esa bu fikrni darhol qo‘llab-quvvatladi. 2020-yil koronavirus pandemiyasining boshlanishida Kolizey sayyohlar uchun yopildi. 2021-yilning 26-aprel kuni esa uning faoliyati qayta tiklandi. Pandemiya boshlanguncha amfiteatr uch ming kishini ichiga sig‘dira olgan bo‘lsa, hozir unga atigi 14 kishidan iborat sayyohlar guruhi tashrif buyurishi mumkin, ular orasida 15 daqiqalik tanaffus bo‘lishi talab etiladi.

Avvalroq Rimda Sezar o‘ldirilgan joy sayyohlar uchun yangi qadamjoga aylanishi haqida xabar berildi. Ma’lumotlarga ko‘ra, ushbu sayyohlik obyekti 2022-yilda taqdim etilishi rejalashtirilgan.

Miloddan avvalgi IV va II asrlarga tegishli butxonalarning xarobalari va eramizdan oldingi 45-yilning 15-mart kuni Sezar o‘ldirilgan Pompey ma’muriy birligi joylashgan Sakra maydoni hozir tashlandiq joyga aylangan. Ushbu xarobalar 1920-yilda, o‘rta asrlarga tegishli barcha binolar Benito Mussolinining buyrug‘i bilan vayron qilinganidan keyin topilgan. Unga yaqinlashish taqiqlanib, uni faqat tashqaridan ko‘rish mumkin edi. Tez orada bu joyni mushuklar boshpana qilib oldi. Hozir hayvonlar nodavlat pansionatlar xodimlari tomonidan boqiladi, sterilizatsiya qilinadi va parvarishlanadi.

Ma’lumot uchun, Italiya 2021-yilning yoz faslida sayyohlar uchun ochilishi mumkin.