Toshkentdagi “Milliy” stadioni avvalgi nomi — “Bunyodkor”ga qayta o‘zgartirildi.
30-aprel kuni stadion peshtoqidan “Milliy” nomi olib tashlangan va “Bunyodkor” so‘zi o‘rnatilgan. Bu haqda “Bunyodkor muxlislari” Facebook sahifasi xabar qildi.
2018-yilda O‘FA tashabbusi bilan “Bunyodkor” deb atab kelingan o‘yingoh nomi “Milliy stadion”ga o‘zgartirilgandi. O‘sha vaqtda arena O‘zbekiston milliy va Olimpiya terma jamoasi ishtirokidagi hamda xalqaro maqomdagi o‘yinlarga mezbonlik qilishi va mamlakatning bosh o‘yingohiga aylanishi aytilgandi.
Ma’lumot uchun, “Bunyodkor” stadioni 34 ming tomoshabinga mo‘ljallangan bo‘lib, u 2012-yil avgustda foydalanishga topshirilgan (qurilish ishlari 2009-yilda boshlangan edi). Stadionning ochilishi marosimi 2012-yil 28-sentabrda bo‘lib o‘tgan.
“Bunyodkor” stadionidagi ilk rasmiy o‘yin esa 2013-yil 26-martda O‘zbekiston hamda Livan terma jamoalari o‘rtasida bo‘lib o‘tgan.
Avvalroq “Bunyodkor” stadioni Toshkent shahar hokimi Jahongir Ortiqxo‘jayev homiyligiga o‘tkazilishi haqida xabar qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)