O‘zbekistonda 2021-yakunigacha kamida ikkita yangi aviakompaniya paydo bo‘ladi. Bu haqda 28-mart, chorshanba kuni bo‘lib o‘tgan matbuot anjumanida transport vaziri va Uzbekistan Airways rahbari Ilhom Mahkamov ma’lum qildi, deya xabar bermoqda “Gazeta.uz”.
Ilhom Mahkamov transport vaziri hamda Uzbekistan Airways rahbari sifatida “monopol siyosatini” davom ettiradi degan taxminlarni rad etdi.
“Bunday emas. Agar siz statistikani ko‘rib chiqsangiz, raqobatbardoshlik yoki monopoliyaning yo‘qligi nafaqat mamlakat ichida yangi aviakompaniyalar paydo bo‘lishiga, balki boshqa mamlakatlar aviakompaniyalarining ham kirib kelishiga ham bog‘liqdir”, — dedi u.
Misol tariqasida, Transport vazirligi rahbari Rossiyadan Uzbekistan Airways bilan bir xil yo‘nalishlarda parvoz qilayotgan 12 ta aviakompaniyani, shuningdek, Turkiyaning Turkish Airlines aviakompaniyasining O‘zbekistonga parvozlarining ko‘payishi, BAAning Air Arabia loukosteri, Qozog‘istonning SCAT va Air Astana kabi aviakompaniyalari hamda Misrning uchta aviakompaniyasining parvozlarini aytib o‘tdi.
Ilhom Mahkamov Qanot Sharq xususiy aviakompaniyasi o‘zining birinchi Airbus A320 samolyotini qabul qilganini ham ta’kidladi. Bir oy ichida yana shunga o‘xshash layner kelishi kutilmoqda.
Mavzuga doir: Qanot Sharq xususiy aviakompaniyasi tomonidan O‘zbekistonga olib kelinayotgan Airbus A320-214 (foto)
Uning so‘zlariga ko‘ra, transport vazirligi bunday kompaniyalarga to‘sqinlik qilmaydi, balki ularni qo‘llab-quvvatlaydi. Yil oxiriga qadar bozorda kamida ikkita yangi aviakompaniya paydo bo‘lishi mumkin, deya taxmin qildi u.
Ilhom Mahkamovning ta’kidlashicha, Uzbekistan Airways ichki parvozlarni ko‘paytirish uchun kam quvvatli samolyotlar sotib olish loyihasi ustida ishlamoqda.
2019-yil iyun oyida Transport vazirligi Uzbekistan Airways’ning samolyotlarni sotib olish strategiyasi o‘zgarayotgani haqida xabar bergandi. Viloyatlararo parvozlar uchun Bombardier yoki Embraer singari kichik hajmli samolyotlarni sotib olish rejalashtirilgan edi.
Mavzuga doir: Uzbekistan Airways Parij, Rim va yana dunyoning 7 ta shahriga amalga oshiriladigan reyslarini yopadi
Oldinroq Samarqand aeroporti ushbu loyihaga 80 mln dollar sarmoya kiritishi kerak bo‘lgan xorijiy Air Marakanda korxonasi boshqaruviga o‘tkazilishi mumkinligi haqida xabar berilgandi. Hukumat kompaniya bilan davlat-xususiy sheriklik shartnomasini tanlovsiz tuzishga ruxsat berdi. Transport vaziri Ilhom Mahkamov Air Marakanda bilan muzokaralar anchadan beri davom etib kelayotganini, ammo DXSh shartnomasi hali imzolanmaganini aytdi. Shu bilan birga, u “tenderga qaytish bu vaqtni yana behuda sarflash” ekanini qo‘shimcha qildi. Air Marakanda moliyaviy modelini baholash uchun xalqaro yuridik va moliya kompaniyalari jalb qilinadi.
15-aprel kuni Prezident Shavkat Mirziyoyev Samarqand viloyatiga tashrifi davomida shahardagi yangi xalqaro aeroportning qurilish ishlari bilan tanishdi. Shuningdek, davlat rahbariga mehmonxonalar, yangi sayyohlik zonasi va yangi aviakompaniya yaratish bo‘yicha loyihalar taqdim etildi.
Taqdimotda ma’lum qilinishicha, yangi tashkil etiladigan aviakompaniya lizing asosida uchta A320 samolyoti va ikkita vertolyot sotib olishni rejalashtirmoqda. Shuningdek, aviakompaniya “Umra” dasturi doirasida Saudiya Arabistoniga reyslarni yo‘lga qo‘ymoqchi. Taqdimot videosida Air Marakanda logotipi tushirilgan samolyot namoyish etildi.
Izoh (0)