Ijtimoiy tarmoqlarda 2021-yil 23-aprel kuni bir guruh shaxslarning katta yo‘lni to‘sib qo‘yib o‘z avtomashinalarida turli manyovrlarni bajargani aks etgan videolavha tarqaldi. Voqeadan ishtirok etgan haydovchilar aniqlandi, deya xabar bermoqda YHXBB.
Toshkent viloyati IIBB YHXB tomonidan olib borilgan surishtiruv ishlari natijasida mazkur holat Bo‘stonliq tumani hududida sodir bo‘lgani, u yerda bir guruh hamkasb yoshlar o‘z avtomobillarida davlat raqamlarini berkitib, drift-shou uyushtirgani aniqlangan.
Shuningdek, qoidabuzar haydovchilarning shaxsiga ham aniqlik kiritilib, ularning Toshkent shahrida yashovchi 1999-yil va 1995-yilda tug‘ilgan fuqarolar ekani aniqlandi.
Ushbu haydovchilarga nisbatan Ma’muriy jinoyat to‘g‘risidagi kodeksning 125 (transport vositalaridan foydalanish qoidalarini buzish) va 128-moddalari (haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) asosida belgilangan tartibda ma’muriy bayonnomalar rasmiylashtirilgan va transport vositalari vaqtinchalik saqlash uchun jarima maydonchasiga joylashtirilgan.
Bundan avval Namanganda velosipedchini urib, voqea joyidan ketib qolgan Kia haydovchisi ushlangani, Samarqandda YPX inspektorlari fuqaroni kuch ishlatib, xizmat mashinasida olib ketgani aks etgan video bo‘yicha rasmiy izoh berilgani hamda Sirdaryoda YPX xodimini “ishdan quritib yubormoqchi” bo‘lgan haydovchiga nisbatan chora ko‘rilgani haqida xabar berilmoqda.
Izoh (0)