Sirdaryo viloyatining Guliston tumani hokimi o‘rinbosari “ayollar daftari”ga kiritilgan fuqaroni arzonlashtirilgan uy oluvchilar ro‘yxatiga kirgizib qo‘yish uchun pora olayotgan vaqtida qo‘lga olindi. Bu haqda Bosh prokuratura huzuridagi Departament matbuot xizmati xabar qildi.
Qayd etilishicha, Departament hamda Davlat xavfsizlik xizmatining Sirdaryo viloyati boshqarmalari tomonidan hamkorlikda tezkor tadbir o‘tkazilgan. Unda “Chorvanasl” markazi Guliston tumani yetakchi mutaxassisi M.X. Guliston tumani hokimi o‘rinbosari B.S. bilan oldindan til biriktirib, “ayollar daftari” ro‘yxatida turuvchi fuqaro M.ni pora berishga dalolat qilib, unga tuman hokimi o‘rinbosari orqali kam ta’minlangan oilalar uchun “Yulduz” massivida qurilayotgan ko‘p qavatli arzonlashtirilgan uy-joylardan xonadon oluvchilar ro‘yxatiga kiritib qo‘yib, uy olib berish evaziga firibgarlik yo‘li bilan 400 AQSh dollarini olgan vaqtida ashyoviy dalillar bilan ushlangan.
Shundan so‘ng M.X.ning ko‘rsatuvlariga asosan tezkor tadbir davom ettirilganda, Guliston tumani hokimi o‘rinbosari B.S. xizmat mavqeyidan foydalanib, yuqoridagi masalada fuqaro M.ga yordam berish evaziga 400 AQSh dollarini M.X.dan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Shahrisabzda olgan porasini qaytarib bergan elektr ta’minoti korxonasi boshlig‘i qo‘lga olingani, Andijonda muqaddam sudlangan hokimlik vakili pora bilan qo‘lga tushgani hamda Samarqandda fuqaroni 50 ming dollarga chuv tushirgan advokat ustidan jinoyat ishi qo‘zg‘atilgani haqida xabar berilgandi.
Izoh (0)