AQSh prezidenti Jo Bayden pandemiya sharoitida aholiga moliyaviy ko‘mak berish to‘g‘risidagi farmonga imzo chekdi, deb yozmoqda Deutsche Welle nashri.
Prezident farmoni davlat xizmatchilarining eng kam ish haqini soatiga 15 dollargacha ko‘tarishni nazarda tutadi (oldingi ko‘rsatkichdan ikki barobar ko‘proq).
“Bu farmon ishchilarning sog‘lig‘i, ruhiyati va harakatlarini yaxshilash orqali, mehnat unumdorligini oshirish va yanada sifatli ish yaratib, soliq to‘lovchilarni munosib sharoitlar bilan ta’minlagan holda, iqtisodiyot va federal shartnomalarning samaradorligiga hissa qo‘shadi”, — deyiladi Oq uy xabarida.
Farmonga muvofiq, eng kam ish haqi keyingi yilning mart oyiga qadar amaldagi 10,95 dollardan deyarli 37 foizga ko‘tariladi va keyinchalik inflyatsiyaga mos ravishda yana oshib boraveradi. Federal agentliklar ish haqi oshirilishi ilova qilingan yangi shartnomalarni 2022-yilning 30-yanvarigacha tuzishi kerak.
Qaror federal xodimlarning turli toifalariga, shu jumladan, barcha farroshlar va xizmat ko‘rsatuvchilardan tortib, pudratchilar va umumiy ovqatlanish sohasi xodimlari, shuningdek, choychaqa oluvchi ishchilargacha tegishli.
Ma’lumot uchun, AQSh prezidenti Jo Baydenning reytingi faoliyatining birinchi 100 kunida 52 foizni tashkil qildi. 1945-yildan buyon bu ko‘rsatkich faqat Jerald Ford (48 foiz) va Donald Trampda (42 foiz) pastroq bo‘lgan.
Avvalroq Jo Bayden iyun oyida davlat rahbari sifatida birinchi bor chet elga safar qilishi haqida xabar berildi. U Buyuk Britaniya va Belgiyaga boradi. Uning chet el rahbari bilan birinchi telefon suhbati 23-yanvar kuni Kanada bosh vaziri Jastin Tryudo bilan bo‘lib o‘tdi. Bir necha kundan keyin Bayden Putin bilan telefonda gaplashdi, suhbat taxminan yarim soat davom etdi.
Shuningdek, Oq uy Rossiyaga qarshi kiritilgan sanksiyalarning natijalariga baho berdi va ularni hozircha prezident Jo Bayden ma’muriyati kutgan natijalarga “juda yaqin”, deb atadi.
Izoh (0)