Buyuk Britaniyaning yuzlab pochtachilari dasturiy ta’minotdagi nosozlik sababli sudga tortilgani ma’lum bo‘ldi

Buyuk Britaniyaning Post Office kompaniyasi bir necha o‘n yillar davomida savdo hisobi uchun mo‘ljallangan Horizon ilovasidan dastur kodida xatolik bo‘lgan holda foydalanishi natijasida pochtachilarning ko‘pchiligi sudga tortilgan edi. “Buyuk Britaniyaning eng yirik sud jarayoni” haqida BBC News xabar berdi.

Ta’kidlanishicha, Post Office Yaponiyaning Fujitsu kompaniyasiga tegishli maxsus Horizon dasturidan foydalangan. 2000—2014-yillar davomida tizimdan olingan ma’lumotlar asosida 736 nafar pochtachi jinoiy javobgarlikka tortilgan (haftasiga o‘rtacha bir nafardan).

Ularning ba’zilari yolg‘on xabar va o‘g‘rilik uchun qamoqqa olingan bo‘lsa, yana ko‘pchiligi jarimaga tortilib, oilasi va mol-mulkidan ayrilgan.

Oradan 20 yil o‘tgach sobiq xodimlar kompyuter tizimining noto‘g‘ri ishlaganini da’vo qilib, o‘zlarining ishini qayta ko‘rib chiqish uchun sudda g‘alaba qozondi. London Qirollik sudi 23-aprel kuni Post Office xodimlariga nisbatan 39 ta oqlov hukmini chiqardi.

Hukm e’lon qilinganda kompaniya Horizon dasturiy ta’minotining ishonchliligiga “haddan ortiq ishongani”ni tan oldi. Ma’lumot uchun, 2019-yilda Post Office 555 nafar jabrlanuvchiga kompensatsiya to‘lagan edi, o‘shanda kompaniya buxgalteriya tizimidagi muammolardan jabr ko‘rgan xodimlarga tovon puli to‘lashning yaxlit tizimini tashkil etgan edi.

BBC ma’lumotlariga ko‘ra, Post Office’dan tovon puli olish uchun jami 2400 dan ortiq ariza berilgan. Vaqt o‘tishi bilan ularning soni ortishi va to‘lovlarning bir qismini qoplash uchun davlat aralashuvi talab qilinishi mumkin.

Shuningdek, kompaniya Horizon dasturidan bugungi kungacha foydalanib keladi. Kelajakda uni boshqa dasturiy ta’minotga almashtirish rejalashtirilgan.