O‘zbekistonda 1-apreldan tibbiyot xodimlari va 65 yoshdan katta shaxslarni koronavirusga qarshi ommaviy emlash jarayoni boshlandi va o‘tgan 26 kunda 565 mingdan ortiq kishi vaksinalarning birinchi dozasini oldi. Kuzatuvchilarning fikricha, agar emlash sur’ati hozirgidek sust qolsa, butun O‘zbekiston aholisida koronavirusga qarshi immunitet hosil qilishga bir necha yil kerak bo‘lishi mumkin.
Oliy Majlis Qonunchilik palatasi deputati Doniyor G‘aniyev 27-aprel kuni Twitter’dagi sahifasida mazkur holat bosh vazir o‘rinbosari Behzod Musayevning so‘zlariga asoslanib fikr bildirdi. Jumladan, vaksinatsiya jarayoni nima sababdan sust ketayotgani bo‘yicha hukumat a’zosining fikrlarini e’lon qildi.
Bosh vazir o‘rinbosari Behzod Musayevga ko‘ra, vaksina bilan emlash jarayonlari sust ketayotganining asosiy sababi — 65 va undan katta yoshdagi fuqarolarimiz orasida emlanishni istayotganlar soni kamligi, vaksinaga nisbatan ishonch kamligida ekan. Jarayonni tezlatish uchun targ‘ibot ishlarini kuchaytirishar ekan.Ma’lumot uchun, O‘zbekiston hukumati aprel—iyun oylarida 4 million, yil oxirigacha 7 million aholini koronavirusga qarshi emlashni rejalashtirgan edi. 27-aprel kuni Rossiyadan “Sputnik V” vaksinasi ikkinchi komponentidan 50 ming doza, Xitoydan ZF-UZ-VAC 2001 o‘zbek-xitoy vaksinasidan 1 million doza O‘zbekistonga olib kelindi.Shuningdek, bosh vazir o‘rinbosarining aytishicha, oy oxirigacha qo‘shimcha vaksina partiyalari keltirilgach, emlash jarayoniga oliy ta’lim va sog‘liqni salqash tizimi xodimlari jalb qilinadi hamda kunlik emlanganlar soni bir necha baravarga oshishiga erishildi.
Doniyor G‘aniyev, Oliy Majlis Qonunchilik palatasi deputati
Izoh (0)