Namanganda Gollandiya lolalarining 18 xili parvarishlanmoqda. Ular 2022-yildan eksport ham qilinadi
Namangan viloyatining Kosonsoy tumanidagi plantatsiyada Gollandiya lolalarining 18 xili parvarishlanmoqda. Bu haqda “Daryo” muxbiri Azizbek Abduvaliyev xabar bermoqda.
Plantatsiya uchun Kosonsoyning “Tuyato‘ydi” massivi tanlangani bejiz emas. Bu hududning tog‘lar va suv omboriga yaqinligi xorij lolalarini o‘stirish uchun maqbul deb topildi.
“Yashirmayman, dastlab bu taklifga qarshi bo‘ldim. Paxta-g‘alladan bo‘lagini bilmasdim-da. Hozir bo‘lsa xursandman, yaxshi ham o‘shanda oyoq tirab turib olmaganim, deyman. Chunki qariyalar duo qilishyapti, qo‘shni viloyatlar, hatto Samarqand va Jizzaxdan ham lolazorni ko‘rgani kelishyapti”, — deydi Kosonsoy tumanidagi “Tuyato‘ydi kelajagi” fermer xo‘jaligi rahbari Zohidjon Bahromov.
Fermerning aytishicha, Namangan gulchilikni rivojlantirish markazi va gollandiyalik mutaxassislar ko‘magida tashkil etilgan plantatsiya uchun 600 million so‘mga yaqin mablag‘ sarflangan. Bu yil xarajatlarni qoplab, foydaga chiqishni ko‘zlab turibdi. Mahsulotlarini asosan gulchilar, go‘zallik salonlari va gul do‘konlari egalari xarid qilmoqda.
Mahalliy va xorijiy lola o‘rtasidagi farq haqidagi savolga esa shunday javob berdi:
“Mahalliy tog‘ lolalari bular kabi katta ochilmaydi va ko‘p turmaydi, 10—15 kunda to‘kilib ketadi. Gollandiya lolalari esa bir-ikki oy turadi, uzilgan holda ham kamida 20—25 kun saqlash mumkin. O‘ziga yarasha mehnati ham bor. Ekish, o‘toq, dorisini vaqtida berish kerak. Lekin sovuqqa chidamli. O‘tgan yili rosa qiyg‘os gullagan payti, 9-aprelda ustiga 5 santimetr qor yog‘gan. Tamom, sovuq urib ketdi, deb o‘ylagandik. Yo‘q, ta’sir qilmagan. Issiqni, jaziramani yoqtirmaydi”, — deydi fermer.
Zohidjon Bahromovning aytishicha, fermer lola plantatsiyasi uchun ajratilgan maydonni ikki baravar ko‘paytirib, 10 gektarga yetkazmoqchi. Bunga qo‘shimcha yana bir issiqxona ham quradi. Eksportni yo‘lga qo‘yish niyatida, hozirning o‘zida kelgusi yil hosili uchun Tojikiston va Qirg‘izistondan buyurtmalar bor.
“Kelgusida o‘zimda yetishtirilgan gullardan atir va sovunlar ishlab chiqarishni yo‘lga qo‘ymoqchiman. Buning uchun xorijdan dastgohlar olib kelamiz. Piyozini qand kasaliga davo deyishadi, o‘zimizdagi farmatsevtika korxonalari bilan hamkorlikni yo‘lga qo‘ymoqchiman. Lola moyining bir litri narxi 20 ming dollarga boradi deb eshitganim bor, buni ham o‘rganamiz. Xullas, lola biznesiga endi jiddiy kirishamiz”, — deydi Bahromov.
Plantatsiyadan qaytayotganimizda bo‘lajak kelin-kuyovlarga ko‘zimiz tushdi. Mahalliy yoshlar uchun lolazor fonida fotosessiya uyushtirish odatiy holga aylanibdi.
