25-aprel kuni Taxiatosh IESdagi nosozlik sabab Qoraqalpog‘istonning ayrim hududlarida elektr ta’minoti uzilgani to‘g‘risida xabarlar tarqalgan edi. “Issiqlik elektr stansiyalari”ning ma’lum qilishicha, issiqlik elektr stansiyasida yong‘in va shu kabi favqulodda holatlar yuz bermagan.
“Ayrim ijtimoiy tarmoqlarda Taxiatosh IESda yong‘in yuz bergani va buning natijasida Qoraqalpog‘iston Respublikasining aksariyat hududlarida elektr energiyasi uzilishi yuz bergani haqida turli xabarlar tarqalmoqda. ‘Issiqlik elektr stansiyalari’ rasman shuni ma’lum qiladiki, Taxiatosh IESda hech qanday yong‘in va shu kabi favqulodda holatlar yuz bermagan. Buni Favqulodda vaziyatlar vazirligi ham tasdiqlagan”, — deyiladi xabarda.
Ma’lum qilinishicha, 25-aprel kuni soat 20:46 da stansiyadagi ochiq taqsimlovchi qurilmada qisqa tutashuv yuz bergani sababli 1-sonli bug‘-gaz qurilmasi va 1, 3-sonli turbogeneratorlar avtomatik himoya tizimining ishga tushishi natijasida o‘chib qolgan.
Voqea natijasida energouskunalarga hech qanday talafot yetmagan. Soat 21:23 da stansiyada ochiq taqsimlovchi qurilmaning ish faoliyati tiklangan. Ta’kidlanishicha, energobloklar bosqichma-bosqich ishga tushirilib energotizimga ulanmoqda.
Mavzuga doir:
Izoh (0)