Amazon soch turmaklarini virtual “o‘lchab ko‘rish” imkonini beradigan sartaroshxona ochdi

Amazon kompaniyasi o‘zining ilg‘or texnologiyalarini sartaroshlik biznesiga joriy etishga qaror qildi. Amerika kompaniyasi Londonda mijozlarga qo‘shimcha reallikka ega maxsus dastur yordamida turli soch turmaklari va ranglarini sinab ko‘rish imkonini beradigan sartaroshxonani ochdi, deb xabar beradi 3DNews.

Qo‘shimcha reallikka ega texnologiya ko‘zguga o‘rnatilgan tegishli dasturiy ta’minotga ega planshet kompyuter yordamida ishlaydi. Salon mijozi planshet frontal kamerasi qarshisiga o‘tiradi, shundan so‘ng maxsus dasturda turfa rangli sochlar va turmaklar paydo bo‘ladi hamda ular orasidan ma’qulini tanlash mumkin.

Shuningdek, Amazon sartaroshxonasi mijozlari planshetni biror mahsulotga yaqinlashtirib, uning ishlab chiqaruvchisi va boshqa ma’lumotlarni qo‘lga kiritish imkonini beradigan texnologiyani ham sinovdan o‘tkazishlari mumkin. Olingan ma’lumotlar asosida xaridor QR-kodni skanerlab, Amazon sayti orqali mahsulotni rasmiylashtirishi mumkin.

Shuningdek, salon an’anaviy sartaroshlik xizmatlarini ham taqdim etmoqda. Ayni vaqtda ushbu xizmatdan kompaniya xodimlari foydalanishi mumkin, ammo yaqin haftalar ichida u barcha uchun ochiladi.

Avvalroq Amazon onlayn-riteyleri Dash Carts nomli “aqlli” aravachalarni taqdim etgandi. Xaridorlar endilikda sotuvchilar bilan muloqotga kirishishi va kassaga navbatda turishga majbur emas.