Surxondaryo viloyatidan Buxoroga og‘irligi 293,36 gramm bo‘lgan qoradorini olib kirayotgan shaxsga sud hukmi o‘qildi. Bu haqda Jinoyat ishlari bo‘yicha Qorako‘l tumani sudi raisi Jalol Sadirov ma’lum qildi.
Sud hujjatlariga ko‘ra, 2020-yilning 10-dekabr kuni DXX Buxoro viloyat boshqarmasi hamda IIB xodimlari tomonidan profilaktik tadbir o‘tkazilgan. Tadbirda Kogon shahri, Xo‘jabargi ko‘chasidagi temiryo‘l kechishmasidan o‘tuvchi A-380 avtomobil yo‘lida Qorovulbozor—Buxoro yo‘nalishi bo‘yicha harakatlanib kelayotgan 80 V 954 MA davlat raqam belgili Nexia to‘xtatilgan. Mazkur avtomashina qorako‘llik fuqaro M.Q.ga tegishli ekani aniqlangan. Avtomashinada A.U. hamda Sh.X.dan tashqari yana ikki nafar fuqaro ham bo‘lgan. Huquq-tartibot idoralari vakillari tomonidan transport vositasining saloni tekshirilgan. Va avtomashina salonidagi barning ichidan bir nechta bo‘lakdagi qora rangli polietilen paketlari topilgan. Shu yerning o‘zida mazkur vosita ekspertiza qilingan va xulosaga ko‘ra, bu vositalarning sof og‘irligi 293,36 grammni tashkil qiluvchi ko‘p miqdordagi qoradori ekani aniqlangan. Qoradori protsessual tartibda rasmiylashtirilib, olib qo‘yilgan.Ushbu qoradori 1981-yilda tug‘ilgan fuqaro A.U.ga tegishliligi aniqlangan. Bildirilishicha, A.U. 2008-yildan buyon o‘z tomorqasida talqon mahsulotini (nos tayyorlanadigan o‘simlik) yetishtirib, ushbu o‘simlikni Surxondaryo viloyatiga olib borib sotish bilan shug‘ullanib kelgan. 2017-yilda esa u Denov tumanida yashovchi kirakash F.R. bilan tanishib qolgan va shundan buyon talqonni uning boshqaruvidagi Labo’da Surxondaryo viloyatining turli hududlariga tarqatib sotgan. Sudlanuvchining aytishicha, 2020-yil sentabr oyida Surxondaryo viloyatining Sho‘rchi tumaniga talqon mahsulotini olib borishganda, F.R.ning avtomashinasida qoradorini choy bilan ichgan. Sudda “O‘shandan buyon ushbu modda menga ma’qul bo‘lgan va shundan buyon giyohvandlik vositasini iste’mol qilib kelaman” degan A.U. 2020-yilning oktabr oyida F.R.dan 2 million 200 ming so‘m evaziga qoradori sotib olib, uyiga keltirib, iste’mol qilib kelayotganini ochiqlagan.
2020-yilning noyabr oyida esa 15 million so‘m evaziga 2 tonna talqon mahsulotini tayyorlab, uni yo‘lovchi tashuvchi Isuzu rusumli avtobus orqali sherobodlik fuqaro X.N.ga yuborgan. 9-dekabr kuni esa X.N.dan talqonning pulini olib, avtomashina yukxonasiga qo‘ygan. Shundan so‘ng u F.R. bilan yashirin ravishda uchrashgan. 18 million so‘m va 2100 dollar evaziga sotib olgan, taxminan, 300 gramm qoradorini jiyani boshqaruvidagi avtomashina saloniga yashirib qo‘ygan. Uning xatti-harakatidan esa jiyani va hamqishlog‘i xabarsiz qolgan. 2020-yil 10-dekabr kuni soat 12:00 da Kogon shahridagi temiryo‘l kesishmasidan o‘tish paytida huquqni muhofaza qiluvchi organ xodimlari avtomashinani to‘xtatib, ko‘zdan kechirgan va holatga guvoh bo‘lgan.
Jinoyat ishlari bo‘yicha Qorako‘l tuman sudi hukmiga ko‘ra, fuqaro A.U. Jinoyat kodeksining 276-moddasi 2-qismining “a” bandi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) bilan aybli deb topilgan va unga 4 yil 6 oy muddatga ozodlikdan mahrum qilish jazosi tayinlangan.
Izoh (0)