Indoneziya prezidenti Joko Vidodo rasman KRI Nanggala-402 suvosti kemasini Bali dengizida halokatga uchragan deb e’lon qildi va ekipaj a’zolarining oilalariga hamdardlik bildirdi, deb yozadi “Kommersant”.

Foto: AP Photo

Kema bortida 53 kishi bo‘lgan. KRI Nanggala-402 21-aprel kuni o‘quv mashg‘ulotlari chog‘ida aloqaga chiqmay qo‘ygandi.

“Armiya va flot KRI Nanggala-402 suvosti kemasining maqomini ‘aloqani yo‘qotdi’dan ‘cho‘kib ketdi’ga o‘zgartirdi. Butun Indoneziya xalqi fojia yuzasidan chuqur hamdardlik izhor etadi”, — dedi Joko Vidodo jurnalistlarga.

KRI Nanggala-402 suvosti kemasi 21-aprelda Bali oroli yaqinidagi torpedolarni chiqarish bo‘yicha harbiy o‘quv mashg‘ulotlari vaqtida yo‘qolgan. Kema bortida 53 nafar odam bo‘lgan. Keyinchalik AQSh Indoneziyaning g‘oyib bo‘lgan suvosti kemasini qidirish uchun aviatsiya yuborishi, bedarak yo‘qolgan suvosti kemasida kislorod tamom bo‘lgani haqida xabarlar berilgan. Sodir bo‘lgan voqeaning kelib chiqish sabablari yuzasidan rasmiy taxminlar bildirilmagan.

Keyinroq Indoneziya harbiy-dengiz kuchlari suvosti kemasidagi buyumlar topilgani, 53 nafar ekipaj a’zosining hammasi halok bo‘lganini ma’lum qildi. 24-aprel kuni Indoneziya Harbiy-dengiz kuchlari shtabi boshlig‘i suvosti kemasining bo‘laklari, taxminan, 850 metr chuqurlikdan topilgani haqida xabar berdi. Kema 500 metrgacha chuqurlikka tushish uchun mo‘ljallangan edi. KRI Nanggala-402 1981-yilda Germaniyada qurilgan, 2011-yilda esa modernizatsiya qilingan edi. Bu Indoneziya Harbiy-dengiz kuchlari arsenalidagi beshta shunday kemadan biridir.