Indoneziya harbiy dengiz kuchlarining bir necha kun oldin bedarak yo‘qolgan KRI Nanggala-402 suvosti kemasidagi uch kunga mo‘ljallangan kislorod zaxirasi tugagan bo‘lishi mumkin, deb xabar bermoqda Channel News Asia.
Ta’kidlanishicha, hozirda zarar ko‘rgan kemani Bali sohillaridagi suvdan qutqarib olish choralari ko‘rilmoqda.
Shuningdek, qutqaruvchilar 50—100 metr chuqurlikda elektromagnit nurlanishni qayd etdi, uning manbasi yo‘qolgan suvosti kemasi bo‘lishi mumkin.
Ma’lumot uchun, 21-aprel kuni Indoneziyada bortida 53 kishi bo‘lgan suvosti kemasi bedarak yo‘qolgani haqida xabar berildi. Keyinchalik suvda to‘kilgan neft izlari aniqlandi. Qidiruv paytida gidrolokator qisqa vaqt ichida suv ostida soatiga 2,5 uzel tezlikda harakatlangan obyektni qayd etdi. Lekin keyin uning boshqa suvosti kemasi ekani ma’lum bo‘ldi.
AQSh Bali oroli yaqinida bedarak yo‘qolgan kemani qidirishda yordam berish uchun samolyotlar yuboradi.
Indoneziya harbiy dengiz kuchlari shtabi rahbari admiral Yudo Margononing aytishicha, bedarak yo‘qolgan suvosti kemasini qidirishga 3 ta suvosti kemasi, 5 ta samolyot va 21 ta harbiy kema jalb qilingan. Singapur va Malayziya ham qidiruv-qutqaruv ishlarida yordam bermoqda.
Avvalroq Bangladeshning Shitalakshya daryosida 50 nafar yo‘lovchini olib ketayotgan parom (solsimon yassi kema) yuk tashuvchi kema bilan to‘qnashib, cho‘kib ketishi natijasida besh kishi halok bo‘lgani haqida xabar berilgandi.
O‘rta Yer dengizining Tunis qirg‘oqlari yaqinida esa ichida noqonuniy ko‘chayotgan muhojirlar bo‘lgan ikkita qayiq ag‘darilib, cho‘kib ketdi. Qayiqlar Italiyaning Lampeduza oroli tomon ketayotgan edi. Halokat oqibatida kamida 39 kishi halok bo‘lgan.
Izoh (0)