Buxoroda sevgan qizini “issiq-sovuq” qilib qaytarib berishini aytib, 31 yoshli yigitning 3 ming dollarini “uxlatgan” ayolga jinoyat ishi qo‘zg‘atildi

Buxoroda firibgarlik yo‘li bilan pulni qo‘lga kiritgan ayolga nisbatan jinoyat ishi qo‘zg‘atildi. Bu haqda IIV Tergov departamenti xabar berdi.

Ma’lum qilinishicha, 32 yoshli ayol X.S. 2021-yilning mart oyida 31 yoshli T.Sh. ismli yigitning sevgan qizini “issiq-sovuq” yo‘li bilan qaytarib berishni va’da qilib, undan 3 ming dollarni aldov yo‘li bilan qo‘lga kiritgan.

Holat yuzasidan Buxoro shahri bo‘yicha IIO FMB huzuridagi Tergov bo‘limi tomonidan X.S.ga nisbatan Jinoyat kodeksining 168-moddasi 2-qismi “a” bandi (ancha miqdorda firibgarlik) bilan jinoyat ishi qo‘zg‘atilgan.

Ta’kidlanishicha, tergov harakatlari davomida X.S.ning boshqa jinoyatga aloqadorligi tekshirilib, huquqiy baho berilishi ta’minlanadi.

Hozirda tergov ishlari davom etmoqda.

Avvalroq Qashqadaryoda 14 yoshli qizning “boshini aylantirib”, otasiga tegishli 7,3 ming dollarni qo‘lga kiritgan yigit ushlangani, Surxondaryoda 10 million so‘m evaziga er-xotin ajrimini tezlashtirishni va’da qilgan soxta advokat qo‘lga olingani haqida xabar berilgan edi.