Rossiya Ichki ishlar vazirligi noqonuniy muhojirlarga mamlakatda vaqtincha bo‘lish muddatini uzaytirish uchun vazirlik organlariga murojaat qilishini qat’iy tavsiya qildi. Vazirlik murojaatida muhojirlarga cheklov choralari qo‘llanilmasligi ta’kidlandi, deb yozmoqda “Kommersant”.
“Prezident farmoniga muvofiq, bunday holatda belgilangan sanksiyalarni qo‘llamasdan huquqiy vaziyatni tartibga solish imkoniyati berildi. Rossiyada bo‘lish uchun qonuniy asosi bo‘lmagan shaxslarga o‘zi joylashgan hududlardagi Rossiya Ichki ishlar vazirligining hududiy organlariga murojaat qilishi tavsiya etiladi”, — deyiladi vazirlik saytida.
Vazirlik davlat rahbarining 2020-yil 18-apreldagi farmonini ilova qilgan. Koronavirus tarqalishi munosabati bilan Vladimir Putin imzolangan ushbu farmonga ko‘ra, 2020-yilning 15-martigacha Rossiya hududida bo‘lishiga qonunan ruxsat berilgan mehnat muhojirlari mamlakatda 15-iyungacha qolishi mumkinligi belgilangan edi. Amal qilish muddati bir necha marta uzaytirildi, hozir noqonuniy muhojirlarning 2021-yilning 15-iyunigacha mamlakatda bo‘lishiga ruxsat berilgan.
O‘tgan haftada ichki ishlar vaziri o‘rinbosari Aleksandr Gorovoy MDH davlatlari vakillariga murojaat qildi va “ularning ko‘plab fuqarolari mamlakat hududida noqonuniy bo‘lib turgani”ni aytdi. U boshqa mamlakatlar rasmiylarini o‘z fuqarolari bilan targ‘ibot ishlarini olib borishga chaqirdi. Gorovoy noqonuniy migrantlardan 15-iyunga qadar mamlakatni tark etishni talab qildi.
Avvalroq Rossiyada yirik loyihalarni amalga oshirish uchun mehnat muhojirlari yetishmayotgani, Moskvaga ishlash uchun borgan 500 dan ortiq o‘zbekistonlik 2 oydan buyon karantindaligi sabab norozilik bildirgani to‘g‘risida xabar berilgandi.
Mavzuga doir:
Izoh (0)