Ichanqal’ada qadimiy quduq topildi. Uning yoshi 150 da ekanligi taxmin qilinmoqda

Ichanqal’a davlat muzey-qo‘riqxonasi hududida olib borilayotgan ta’mirlash ishlari davomida o‘nlab yillar oldin og‘zi yopib tashlangan quduq topildi, deb xabar beradi O‘zbekiston Fanlar akademiyasi. Uning noan’anaviy ko‘rinishi olimlarda qiziqish uyg‘otgan.

Ma’lum qilinishicha, Xiva shahrida, xususan, shaharning qadimiy qismi hisoblangan Ichanqal’a davlat muzeyi qo‘riqxonasi hududida turizmni rivojlantirish va xorijlik mehmonlarga ko‘rsatilayotgan xizmatlar sifatini hamda muzey qo‘riqxonasi hududida istiqomat qiluvchi mahalliy aholining maishiy turmushini yaxshilash, shaharning ichida kommunikatsiya, ichimlik va oqova suvlar, gaz ta‘minoti tizimlarini yangilash ishlari olib borilmoqda.

“Kuni kecha Xiva shahrining Ichanqal’a davlat muzey-qo‘riqxonasi hududidagi ta’mirlash ishlari chog‘ida bundan bir necha yillar oldin yopib tashlangan quduq og‘zi ochildi. Biroq uning noan’anaviy ko‘rinishi turli xil farazlarga sabab bo‘lmoqda”, — deyiladi xabarda.

Ushbu quduq boshqa suv quduqlari kabi pastdan tepaga torayib ketmasdan, uning barcha qismida diametri bir xil, ya’ni 2,60 metrni tashkil qiladi. Chuqurligi 5,60 metrga teng.

Qadimgi an’anaga ko‘ra quduqning asosi, ya’ni poydevor qismiga Xorazm sharoitida ko‘p uchrovchi daraxt, tut yoki gujumdan yog‘och o‘rnatilgan. Yog‘ochning qalinligi 16 santimetr atrofida. Quduq devorlariga 25x25x6 santimetr o‘lchamdagi pishgan g‘isht nozik did bilan terilgan. G‘ishtlar yuzasida rombsimon belgilar mavjud. Quduq, taxminan, bundan 100-150-yil oldin qurilgan. Hozirgi kunda mazkur quduqdan aynan nima maqsadda foydalanilgani masalasi ilmiy jihatdan o‘rganilmoqda.