Buxoroda chorva mollarini o‘g‘irlab ketgan yigitlar qo‘lga olindi, deya xabar bermoqda IIV.
Buxoro viloyatining Buxoro shahar, Buxoro va Kogon tumanlari hududida sodir bo‘lgan o‘g‘riliklarni fosh etish maqsadida tezkor-qidiruv tadbirlari olib borilgan. Natijada chorva mollarini o‘g‘irlab kelayotgan jinoiy guruhning faoliyatiga chek qo‘yilib, hududlarda mavhum holatda sodir etilgan 5 ta jinoyat fosh etilgan.
Qayd etilishicha, 2021-yilning 8-aprel kuni Buxoro shahar “Losha” mahallasida yashovchi Yu.Yo.ning qo‘yxonasidan bahosi 1 000 000 so‘mlik bir bosh qo‘y, 11-aprel kuni shaharning “Otbozor” mahallasida yashovchi fuqaro B.S.ning qo‘yxonasidan har birining bahosi 1 000 000 so‘mlik ikki bosh qo‘y, 12-aprel kuni esa Kogon tuman “Kogon” mahallasida yashovchi fuqaro R.A.ning qo‘yxonasidan bahosi 5 200 000 so‘mlik 3 bosh qo‘y va 1 bosh qo‘zi, 13-aprel kunidan 14-aprel kuniga o‘tar kechasi Buxoro tumanidagi “Mustaqillik” mahallasida yashovchi I.Q.ning qo‘yxonasidan har birining bahosi 1 300 000 so‘mga teng bo‘lgan uch bosh qo‘y, xuddi shu tunda tuman markazidagi Zarafshon ko‘chasida yashovchi fuqaro N.O.ga tegishli bo‘lgan har birining bahosi 1 800 000 so‘mga teng bo‘lgan ikki bosh qo‘chqor yashirin ravishda o‘g‘irlab ketilganligi to‘g‘risida ichki ishlar organlari navbatchilik qismlariga xabarlar kelib tushgan.
Har bir xabar yuzasidan tegishli tuman va shahar ichki ishlar organlarining tergov-tezkor guruhlari hodisa sodir bo‘lgan joyga chiqib, zaruriy surishtiruv hamda tergovga qadar tekshiruv harakatlarini olib borgan holda, ushbu beshta holat yuzasidan Jinoyat kodeksining 169-moddasi (o‘g‘irlik) bilan jinoyat ishlari qo‘zg‘atilib, dastlabki tergov harakatlari olib borilgan.
Mazkur jinoyatlarning obyektiv hamda subyektiv tomonlari, jinoyat sodir etilishining fakultativ belgilari tahlil qilingan holda aniqlangan umumiy jihatlardan kelib chiqib, viloyat Ichki ishlar boshqarmasi boshlig‘ining 1-o‘rinbosari podpolkovnik Mansur Qodirov boshchiligida viloyat Ichki ishlar boshqarmasi Jinoyat qidiruv boshqarmasi hamda ushbu shahar va tumanlar ichki ishlar organlarining xodimlaridan iborat alohida tergov-tezkor guruhlari tuzilib, viloyat bo‘ylab keng miqyosli tezkor surishtiruv, tergovga qadar tekshiruv hamda tergov harakatlari olib borildi.
Olib borilgan tezkor surishtiruv harakatlari davomida ushbu jinoyatlar 3 nafar shaxsdan iborat jinoiy guruh tomonidan sodir qilinganligi aniqlandi.
Jumladan:
- jinoiy guruh tashkilotchisi 1999-yilda tug‘ilgan muqaddam Jinoyat kodeksining 109 (qasddan badanga yengil shikast yetkazish), 166 (talonchilik), 169-moddalari (o‘g‘rilik) bilan sudlangan Buxoro tumani “Gala Osiyo” mahallasida yashovchi Sh.Sh. o‘g‘rilik sodir qilinadigan xonadonlarni aniqlab, ko‘zdan kechirgan holda jinoiy sheriklariga vazifalarni taqsimlab berib, o‘g‘rilik sodir qilinadigan manzillarga boshlab borgani;
- jinoiy guruhning ikkinchi a’zosi 1999-yilda tug‘ilgan muqaddam Jinoyat kodeksining 277-moddasi (bezorilik) bilan sudlangan, Buxoro tumani “Nometan” mahallasida yashovchi K.J. bo‘lib, u jinoyatlarni sodir etishda bevosita ishtirok etib, o‘g‘irlangan chorva mollarini boshqaruvidagi Matiz rusumli avtomashinasida bozorga olib borib, sotishda yetakchilik qilgani;
- 1999-yilda tug‘ilgan Buxoro shahar “Otbozor” mahallasida yashovchi T.U. esa jinoiy guruhning uchinchi a’zosi bo‘lib, boshqaruvidagi oq rangli Matiz rusumli avtomashinada haydovchilik qilib, jinoiy sheriklarini voqea joyiga olib borib kelgan.
Hozirda jinoiy guruhning fosh etilmay qolgan boshqa jinoyatlarga aloqadorliklarini aniqlash maqsadida tezkor-surishtiruv hamda jinoyat ishlari bo‘yicha dastlabki tergov harakatlari davom ettirilmoqda.
Bundan avval Olmazorda qariyb 36 million so‘mlik tilla taqinchoqlarini o‘g‘irlatganini aytgan ayolning o‘zi bu ishni qilgani aniqlangani, Farg‘onadagi Xizr buva ziyoratgohiga tashrif buyurganlarning cho‘ntagidan pul o‘g‘irlagan ayol ushlangani hamda Toshkentda to‘lov terminallarini o‘marib ketganlar 5 yilga qamalgani haqida xabar berilgandi.
Izoh (0)