Shanxay avtosalonida BMW 7-seriyaning cheklangan nusxada ishlab chiqarilgan Shining Shadow Special Edition versiyasining premyerasi bo‘lib o‘tdi. Mashinaning asosiy o‘ziga xosligi — ikki xil rangli kuzovida. Bu kabi rangdan Mercedes-Maybach lineykasidagi avtomobillarni bo‘yashda foydalaniladi, deb xabar beradi Motor.
BMW’ning maxsus versiyasini yaratishda uzaytirilgan 760 Li xDrive modifikatsiyasidan foydalanilgan bo‘lib, uning uzunligi 5,26 metrga yetadi. Kompaniyadagilarning ma’lum qilishicha, sedan kuzovini ikki xil rangga — yuqori qismi kumushrang va pastki qismi qirmizi — bo‘yash uchun deyarli bir hafta sarflanadi. BMW 7 Series Shining Shadow, shuningdek, 15 ta kegayli original dizaynga ega 20 dyuymli diskalari bilan ajralib turadi.
Mashina saloni oq charm bilan qoplangan, dekorativ qismi laklangan yog‘ochdan ishlangan, o‘rindiqlarning barchasi massaj funksiyasiga ega, ikkinchi qator yo‘lovchilari uchun esa old o‘rindiqlar orqasiga ekranlar qotirilgan.
Mazkur maxsus versiya 585 ot kuchiga ega 6,0 litrli V12 dvigateli yordamida harakatga keladi. Mashinaning soatiga 100 kilometr tezlikka erishishi uchun 3,8 soniya kifoya.
7 Series Shining Shadow sedani cheklangan 25 nusxada ishlab chiqarilib, Xitoy bozorida sotuvga chiqadi. Ikki xil rangli model 2,6 million yuandan (400 ming dollar) sotilishi rejalashtirilgan.
Avvalroq Mercedes-Benz kompaniyasi o‘zining premium sinfiga kiruvchi EQS elektrosedanini taqdim etgani to‘g‘risida xabar berilgandi.
Izoh (0)