Adliya vazirligi tomonidan kiritilgan taqdimnomaga ko‘ra, Toshkent shahar Yakkasaroy tumani hokimining 442 ta uyni boshqaruv tashkilotlariga berish to‘g‘risidagi qarori bekor qilindi. Bu haqda vazirlik matbuot xizmati xabar berdi.
28-yanvarida fuqaro V.Ch.ning Toshkent shahri Yakkasaroy tuman hokimligi tomonidan noqonuniy ravishda tumandagi ko‘p kvartirali uylarni boshqarish uchun boshqaruv tashkilotlariga berish haqida qaror qabul qilingani haqidagi murojaati Adliya vazirligiga kelib tushgan.
Vazirlik tomonidan o‘tkazilgan o‘rganish natijasida murojaatda bildirilgan vajlar o‘z tasdig‘ini topgan.
Xususan, “Ko‘p kvartirali uylarni boshqarish to‘g‘risida”gi qonunga muvofiq ko‘p kvartirali uyni boshqarishni boshqarish tashkilotiga berishning tartibi va shartlari aniq belgilangan.
Jumladan, ko‘p kvartirali uydagi joylar mulkdorlarining umumiy yig‘ilishida mulkdorlar o‘rtasida kelishuvga erishilmagan taqdirda uch oylik muddatda ko‘p kvartirali uyni boshqarish organi vazifalarini amalga oshiruvchi boshqaruv tashkilotini yoki boshqaruvchini ochiq tanlov orqali belgilanadi, tanlov haqidagi ma’lumot Uy-joy kommunal xizmat ko‘rsatish vazirligining rasmiy veb-saytiga va boshqa ommaviy axborot vositalariga joylashtiriladi.
“Biroq ushbu qonun talablariga rioya etilmagan holda Yakkasaroy tuman hokimining 2021-yil 15-yanvardagi ‘Yakkasaroy tumanida ko‘p qavatli uy-joy fondini boshqaruv kompaniyalariga biriktirish to‘g‘risida’gi 21-son qarori qabul qilinib, qarorga muvofiq tumandagi 442 ta ko‘p qavatli uylar 7 ta boshqaruv tashkilotlariga biriktirib berilgan”, — deyiladi xabarda.
Ushbu aniqlangan qonun buzilish holatlarini bartaraf etish yuzasidan Adliya vazirligi tomonidan tuman hokimligiga taqdimnoma kiritilgan va tuman hokimining 2021-yil 1-apreldagi 151-son qarori bilan tuman hokimining yuqoridagi qarori bekor qilingan.
Avvalroq Toshkent hokimining Ahmad Donish va Amir Temur ko‘chalari kesishmasida 65 ta tadbirkorga tegishli bino va inshootlar joylashgan 6 gektar yer uchastkasini davlat va jamiyat ehtiyoji uchun olish to‘g‘risidagi qarori bekor qilingan edi.