Ijtimoiy tarmoqlarda Termiz shahridagi restoranlarning birida bir guruh shaxslar mushtalashayotgani aks etgan video tarqaldi. Surxondaryo viloyati IIB matbuot xizmati holat yuzasidan rasmiy ma’lumot berdi.
Ma’lum qilinishicha, voqea 16-aprel kuni taxminan soat 19:10 larda Termizdagi “Xan Sultan” restoranida yuz bergan. N.N. oila a’zolari bilan ushbu restoranga ovqatlanish uchun kelgan. Biroz vaqt o‘tib ular o‘tirgan stolga do‘sti M.B. ham kelib o‘tirgan va N.N. yana qo‘shimcha buyurtma bergan. Ammo buyurtma kechikkani sabab ofitsiant bilan o‘rtasida tortishuv kelib chiqqan.
Restoran ish boshqaruvchisi Z.T. mijoz N.N.ga janjal qilmaslikni, Ramazon oyida o‘zaro hurmatda bo‘lishni so‘ragan. Bunga javoban N.N. unga baqirib, o‘zaro hurmatda bo‘lmasligini aytganidan so‘ng N.N. va restoran ishchilari o‘rtasida janjal kelib chiqqan.
Janjal vaqtida N.N. qo‘li bilan Z.T.ning yuziga bir marta urgan. Shundan so‘ng N.N.ning qaynukasi A.T. ham janjalga aralashib, Z.T.ning yuziga qo‘li bilan ikki marta urib tan jarohati yetkazgan. A.T.ni tinchlantirmoqchi bo‘lgan restoran ishchilari F.J. va N.A. ham tan jarohati olgan.
Janjal vaqtida restoran eshigining oynasi va idish jamlanmalari urib sindirilgan.
IIV Tergov departamentining ma’lum qilishicha, holat yuzasidan Termiz shahri bo‘yicha IIO FMB huzuridagi Tergov bo‘limi tomonidan 36 yoshli N.N. va 31 yoshli T.A.ga nisbatan Jinoyat kodeksining 277-moddasi (bezorilik) bilan jinoyat ishi qo‘zg‘atilib, protsessual tartibda ushlangan.Tergov harakatlari davomida ular muqaddam bezorilik jinoyatlari uchun sudlangani aniqlangan.
Surxondaryo viloyati IIB matbuot xizmati jinoyat ishi tergov harakatlari davomida restoran ishchilari va boshqa ishtirokchilarning harakatlariga ham qonuniy baho berilishini bildirgan.
Izoh (0)