Buyuk Britaniyada mamlakatni Xitoy va Rossiya kabi dushman davlatlardan himoyalash uchun xorijiy hukumatlar nomidan ishlaydigan shaxslar yangi qonunga binoan qirollikda bo‘lib turganini ro‘yxatdan o‘tkazishi shart. Bu haqda The Times gazetasiga tayanib, “RBK” xabar berdi.

Foto: Getty Images

Gazetaning yozishicha, bosh vazir Boris Jonson 11-may kuni qirolichaning parlamentdagi nutqi paytida dushman davlatlarga qarshi harakat to‘g‘risidagi qonun loyihasi haqida e’lon qiladi.

Ta’kidlanishicha, hujjatda Buyuk Britaniyadagi xorijiy hukumatlar nomidan ishlaydigan barcha shaxslar o‘zlarining qirollikda bo‘lib turganini ro‘yxatdan o‘tkazish talablari belgilab qo‘yilgan va bu talabni e’tiborsiz qoldirish jinoiy javobgarlikka sabab bo‘ladi.

Chet elliklarni ro‘yxatga olish mexanizmi AQSh sxemasi asosida amalga oshiriladi, unga ko‘ra, chet el hukumatlari nomidan ishlaydigan shaxslar, mansabdor shaxslar va siyosiy partiyalar Adliya vazirligida ro‘yxatdan o‘tishi va vaqti-vaqti bilan o‘z faoliyati to‘g‘risida hisobot topshirishlari kerak. Ushbu sxema xorijiy davlat manfaatlarini himoya qiluvchi barcha, shu jumladan, maslahatchilar va jamoatchilik bilan aloqalar bo‘yicha mutaxassislarga nisbatan qo‘llaniladi. The Times gazetasi ta’kidlashicha, Britaniya razvedka idoralari ham xuddi shunday reyestrni yaratishga chaqirilgan, chunki amaldagi qonunchilikka muvofiq, chet el josuslari faqat maxfiy ma’lumotlarni olish uchun pora bilan ushlangan taqdirda javobgarlikka tortilishi mumkin.

Bundan tashqari, hukumat davlat sirlari to‘g‘risidagi qonunni yangilaydi. Yangi versiyada ushbu qonundan chet eldan turib Buyuk Britaniyaning manfaatlarini buzishga urinayotgan shaxslarga, shu jumladan, dushman davlatlar nomidan ishlaydigan xakerlarga qarshi foydalanish mumkin bo‘ladi. Hozirgi qonun faqat chet eldagi britaniyaliklarga tegishli.

Rossiya va Xitoyga nisbatan xavotirlar kuchayib borayotgan bir paytda Jonson ushbu choralarni davom ettirishga qaror qildi, deb yozmoqda The Times.

Daily Mail nashri Buyuk Britaniya hukumati o‘tgan yili ham Rossiya va Xitoydan himoyalanish uchun xorijiy agentlar reyestrini va davlat sirlarini himoya qilish bo‘yicha yangi choralarni yaratishni nazarda tutuvchi qonunlarni qabul qilish imkoniyatini ko‘rib chiqqani haqida yozgan. Biroq, ularning ijrosi keyinga qoldirilgan edi, deb yozadi The Times.

Mart oyi oxirida Buyuk Britaniya Mudofaa vaziri Ben Uolles mamlakat qurolli kuchlarini modernizatsiya qilish strategiyasini taqdim etgan va unda Rossiyadan kelib chiqadigan tahdidni ham qayd etib o‘tgan. Shuningdek, The Times gazetasi Britaniya Rossiyani milliy xavfsizlikka asosiy tahdid deb atagani haqida xabar berigandi. “Britaniyaga asosiy tahdid Rossiyadan kelsa, Xitoy intellektual mulkni o‘g‘irlashga urinadigan va iqtisodiy xavfsizlikka tahdid soladigan raqib hisoblanadi”, — deyiladi Britaniya hukumati manbasida. Hukumatning boshqa bir manbasiga ko‘ra, “Rossiya — dushman davlat, Xitoy — global muammo”. “Xitoyga nisbatan yondashuv quyidagicha bo‘lishi lozim: kerak bo‘lganda raqobatlashish, iloji bo‘lsa, hamkorlik qilish, kerak bo‘lganda qarshilik ko‘rsatish”, — deydi manba The Times gazetasiga.

AQSh Rossiyaga qarshi yangi sanksiyalar kiritganidan so‘ng, Buyuk Britaniya Tashqi ishlar vazirligi Rossiyaning “zararli harakatlari” munosabati bilan Londondagi Rossiya elchisini chaqirtirdi. Tashqi ishlar vazirligi veb-saytida aytilishicha, Buyuk Britaniya AQShning “Rossiyaning dushmanlik xatti-harakatlarini davom ettirishi” borasidagi xavotirlariga qo‘shiladi.