Film suratga olish jarayonlarida vafot etgan yulduzlar (foto)

Mazkur aktyorlar suratga olish jarayonida vafot etgan, ammo ular ishtirokidagi filmlar ekran yuzini ko‘rishga ulgurgan.

Pol Uoker — “Forsaj-7: Tezlik ishtiyoqi”

Pol Uoker karyerasini reklama va teleseriallarda suratga tushishdan boshlagan, ammo haqiqiy mashhurlikka “Forsaj” filmidagi politsiyachi Brayan Konner roli orqali erishgan. Aktyor 2013-yil 30-noyabr kuni do‘sti Rojer Rodas bilan xayriya tadbiridan qaytayotganda avtohalokatga uchragan. Rojer boshqaruvni yo‘qotib qo‘yishi natijasida mashina yonib ketgan. Ikkala do‘st ham voqea joyida vafot etgan: Pol Uoker 40 yoshda bo‘lgan.

O‘sha paytda aktyor “Forsaj” filmining yettinchi qismida rol o‘ynayotgan edi. Uning o‘limi butun guruhga qattiq zarba bo‘ldi: deyarli 15 yil davomida bu film ustida birgalikda ishlagan jamoadagilar yaqin do‘stlarga aylanishgandi.

Filipp Seymur-Xoffman – “Ochlar o‘yini: I va II qism”

Aktyor Nyu-Yorkdagi o‘z uyida katta dozada qabul qilingan giyohvand modda oqibatida vafot etgan. Bungacha u “Ochlar o‘yini” filmining bir necha sahnalarida Plutarx obrazida suratga tushishga ulgurgan. Uning o‘limi barcha uchun kutilmagan hol bo‘lgan. Ertasi kuni aksariyat Amerika gazetalarida ta’ziyanomalar nashr etilgan.

46 yoshli Xoffmanning o‘spirin paytidayoq giyohvand moddalar bilan bog‘liq muammolari bo‘lgan, ammo u 25 yil davomida bu illat kurashgan. O‘limidan 8 oy oldin Filipp reabilitatsiya kursidan o‘tganini va alkogollarning anonim jamiyatida ishtirok etayotganini tan olgan. O‘sha vaqtlarda uning karyerasi gullab-yashnagan davr edi: Aktyorning “Usta” va “Eng xavfli odam” (vafotidan keyin ekran yuzini ko‘rgan) filmlaridagi roli tanqidchilar va tomoshabinlar hayratiga sazovor bo‘lgan.

Afsuski, u “Ochlar o‘yini” filmining eng hissiyotli sahnasini o‘ynashga ulgurmadi. Filipp Xoffman filmning suratga olish ishlari tugashidan bir hafta oldin vafot etdi.

Kori Monteyt — Glee seriali

31 yoshli kanadalik aktyor va musiqachining o‘zi yoshligidan giyohvandlikka qaram bo‘lganini tan olgan. Ma’lum bo‘lishicha, o‘limidan uch oy oldin u yana reabilitatsiya markaziga murojaat qilgan. 2013-yil 13-iyulda u Vankuverdagi mehmonxonadan toksik dori va spirtli ichimlikdan zaharlanish tashxisi bilan o‘lik holda topilgan.

U karyerasining eng omadli davrida vafot etdi: Glee serialidagi obrazi barchaning sevimli qahramoniga aylandi. Shaxsiy hayotida ham u baxtli edi — bir yildan ko‘proq vaqt davomida u o‘sha loyihadagi sherigi Liya Mikel bilan uchrashib yurgandi. Tez orada qiz o‘zining birinchi musiqiy albomini chiqardi va qo‘shiqlaridan birini Kori xotirasiga bag‘ishladi.

Xit Lejer – “Doktor Parnassning tasavvurlari”

“Yomg‘irli dovon” romanining qahramoni nomi bilan atalgan avstraliyalik 2008-yil 22-yanvarda juda ko‘p uyqu dorisi qabul qilishi oqibatida vafot etgan. U 28 yoshda bo‘lgan.

O‘sha paytda u “Qora ritsar” filmidagi yovuz Joker obrazi ustidagi ishini yakunlagan edi. Shu sababli Lejer tarixda vafotidan keyin Oskar olgan ikkinchi aktyor bo‘ldi. Ammo “Doktor Parnassning tasavvurlari” fantastik filmidagi Toni rolini tugatishga ulgurmadi. Keyinchalik mazkur obrazni turli xil sahnalarda uning eng yaqin do‘stlari: Jonni Depp, Kolin Farrell va Jud Lou ijro etgan.

Oliver Rid — “Gladiator”

Rejissor Ridli Skot aktyorni kinodagi 10 yillik tanaffusiga qaramay, filmdagi Proksimo roliga taklif qilgan. Ammo 61 yoshli aktyor suratga olish jarayonlarining so‘ngigacha ishlay olmadi.

Bir kuni kechqurun suratga olish joyi bo‘lgan Maltadagi bir pabda aktyor 12 hissalik rom, sakkiz shisha pivo va yarim shisha viski ichib, armrestlingda Britaniya dengiz flotining bir necha dengizchisini mag‘lub etadi. Keyin to‘satdan u yurak xurujidan yiqilib, o‘sha joyning o‘zida vafot etadi. Uning o‘limidan so‘ng ushbu pivoxona juda mashhur bo‘lib ketadi va “Ollining so‘nggi pabi” nomini oladi. Ridli Skott esa “Gladiator”da Rid obrazini kompyuter effektlari yordamida yakunlaydi.

River Feniks — “Yomon qon”

Aktyor Xoakin Feniksning akasi 23 yoshida Jonni Depp o‘zining musiqiy guruhi bilan tashrif buyurgan tungi klubda yuqori dozadagi giyohvand modda sababli vafot etgan. Shundan so‘ng 1993-yilda “Yomon qon” filmi e’tibordan chetda qolib ketgan.

Ammo 2012-yilda rejissor Jorj Slaser filmning juda ko‘p kadrlarini yo‘q qilish rejalashtirilganidan xabar topgach, filmni tahrir qilib, kadr ortidagi ovoz bilan ta’minlaydi va turli kinofestivallarda namoyish etdi.

Bryus Li — “Ajal o‘yini”

Jang san’ati ustasi 32 yoshida miya shishi tashxisi bilan vafot etgan. Uning Gonkongda ommaviy motamga aylangan dafn marosimidan olingan kadrlar Lining so‘nggi filmi — “Ajal o‘yini”ga ham kiritilgan. Bu ko‘rinish film qahramoni Billi Louning dafn marosimi sifatida namoyish etilgan.

Brendon Li — “Quzg‘un”

Bryus Lining o‘g‘li “Quzg‘un” komiks-filmining so‘nggi sahnasini suratga olish jarayonida o‘ldirilgan. Ssenariyga ko‘ra, dushmanlardan biri uni otib tashlashi kerak bo‘lgan. Ammo o‘sha vaqtda pistoletdan bo‘sh o‘q bilan birga temir tiqin uchib chiqib, uning oshqozonini teshganini hech kim sezmay qolgan. 28 yoshli aktyor juda ko‘p qon yo‘qotishdan vafot etgan. Brendon otasining yoniga dafn etilgan. Uning onasi Linda ishiga beparvoligi sabab kinostudiyani sudga bergan va jarayonda yutib chiqqan. Ammo Lini bilmasdan otib qo‘ygan aktyor Maykl Massiga qarshi hech qanday ayblov ilgari surilmagan. Shunday bo‘lsa-da, u ruhiy tushkunlik oqibatida 10 yilgacha filmlarda rol ijro etmagan.

Merilin Monro — “Nimadir sodir bo‘lishi kerak”

Ushbu komediyani suratga olish paytida aktrisa o‘zining 36 yoshini nishonlagan. 1962-yil 1-iyun uning so‘nggi bor suratga tushgan kuni bo‘lgan. Keyinchalik u o‘zini yomon his qilgani tufayli suratga olish maydonida qaytib ko‘rinmagan. 4-avgust kuni esa uni qo‘lida telefon go‘shagini ushlagan ko‘yi o‘lgan holda topishgan. Rasmiy o‘lim sababi haddan tashqari dozadagi uyqu dorisi deb topilgan. Norasmiy tarzda esa o‘z joniga qasd qilish yoki qotillik.

Filmni yakunlashning iloji bo‘lmagan va “Men qaytib keldim, azizim” nomi ostida yangi aktyorlar va rejissyor jamoasi bilan suratga olingan. Ammo Monro ijro etgan  to‘qqiz soatlik kadr 37 daqiqalik ko‘rinishga keltirilib, ilk marta 2001-yil 1-iyun — aktrisaning 75 yoshga to‘lgan kunida namoyish etilgan.