Har bir aktrisaning o‘ziga xos xususiyatlari mavjud: kimdir muloyim, biroz tushunish qiyin, yana kimdir energiyaga to‘lgan va sho‘x. Kajol esa eng yaxshi fazilatlarni o‘zida mujassam etishi bilan boshqalardan ajralib turadi. Masalan, unda xushchaqchaqlik, nafislik, mardlik xislatlarni ko‘rish mumkin. Shuningdek, uning kareyrasidagi qahramonlarining aksariyati taqdirida ko‘p qiyinchiliklarga uchraydi. Ammo ular to‘siqlarga qaramay, barchasini yengib o‘tadi.
“O‘g‘irlanmagan kelin”
Doimiy ravishda miriqib tomosha qilinadigan hind klassikasi! Otasining do‘stining o‘g‘liga turmushga chiqishi arafasida ko‘nglini umuman boshqa insonga bergan Simran va Raj hikoyasi.
Filmda yoshlar majburiyat va to‘siqlarni yengib o‘tib, baxtli yashash uchun kurashish kerak. Kartina so‘ngiga qadar inson tuyg‘ularini junbushga keltiruvchi ushbu muhabbat tarixi ikki yoshning kurashda g‘olib chiqishi bilan yakun topadi.
“Hayotda hamma narsa bo‘ladi”
Sevgi uchburchagi. Ushbu filmda do‘stlik va muhabbat kabi insoniy rishtalar bir-birga chambarchas bog‘liq ekani aks etgan. Rahul va Anjeli kollejda qadrdon do‘st bo‘lsalar-da, ularning hayotida Tina ismli qizning paydo bo‘lishi barchasini o‘zgartirib yuboradi.
Anjeli sho‘x, bolalarcha o‘yinqaroq, ammo Tina bilan tanishgandan so‘ng Rahulni sevishini tushunib yetadi. Lekin Tina va Rahul o‘rtasida to‘siq bo‘lmaslik uchun kollejni tark etadi.
Oradan yillar o‘tib, Tina Anjeli ismli qiziga vasiyat tarzida bir vaqtlar o‘z sevgisini qurbon qilgan dugonasi hamda Rahulni yarashtirishni so‘raydi. Kartina bir-biridan qiziqarli voqealarga boy bo‘lib, hanuzgacha muxlislar tomonidan sevib tomosha qilinadi.
“Jonim fido”
Kajol ishtirokidagi eng yaxshi filmlardan biri. Aktrisa avvalgi rollaridan biroz farqli o‘laroq ko‘zi ojiz qizni ijro etgan.
Ushbu filmda muhabbat, oila va vatan oldidagi burch namoyish etilgan. Odatda Kajolni Shohrux Xon bilan ajoyib partnyor sifatida qabul qilishgan. Ammo aktrisaning mahoratli aktyor Amir Xon bilan hamkorlikdagi filmi ham muvaffaqiyatga erishgan.
“Mening ismim Xon”
Yuqoridagi filmlar “eng yaxshi”si deyilgan bo‘lsa, mazkir kartina “eng zo‘r”i. Aynan shu loyihada aktrisaning yashirin qirralari butunligicha ochib berilgan.
Filmda ham birgina muhabbat emas, balki inson uchun zarur bo‘lgan umumbashariy tuyg‘ular ishini ko‘rish mumkin. Oradan yillar o‘tsa-da, Kajol va Shohrux Xon Bollivud olamidagi eng yorqin juftlik ekanini isbotlay oldi.
Mazkur kartinaning sujeti juda ham noyob bo‘lib, uni ko‘rmaganlarga tomosha qilish tavsiya etiladi.
Mavzuga doir:
Izoh (0)