YouTube bloger boks qoidalari bo‘yicha jangda sobiq UFC jangchisini 1-raunddayoq nokautga uchratdi
24 yoshli YouTube bloger Jeyk Pol 18-aprel, yakshanba kuni 36 yoshli MMA jangchisi Ben Askrenga qarshi boks qoidalari bo‘yicha jangda ishtirok etdi.
Askren uchun bu professional boksdagi debyut jang bo‘ldi. Jang Atlanta shahri (Jorjiya shtati, AQSh) mezbonlik qilgan Triller Fight Club shousining asosiy voqeasi bo‘ldi.
To‘qnashuv 8 raunddan (har raund 2 daqiqadan) iborat bo‘lishi belgilangandi. Ammo jang 1-raunddayoq nihoyasiga yetdi. Jeyk Pol kuchli zarbasi orqali Askrenni chuqur nokdaun holatiga tushirib qo‘ydi, referi esa jangni to‘xtatdi. Shu tariqa YouTube bloger Jeyk professional boksdagi uchinchi g‘alabasini ham muddatidan avval qo‘lga kiritdi.
Ma’lumot uchun, Ben Askren vaqtida MMA bo‘yicha Bellator va ONE promoushenlarida yarim o‘rta vazn toifasida chempionlikni qo‘lga kiritgandi. Shuningdek, Askren UFC promoushenida tarixida eng tezkor nokautga uchragan sportchi hisoblanadi. 2019-yil 6-iyulida Xorxe Masvidal Askrenni 5 soniya ichida nokautga uchratgandi.
Jeyk Pol esa avvalroq basketbolchi Neyt Robinsonni boks qoidalari bo‘yicha jangda nokautga uchratgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
