O‘zbekistonda 17-aprel kuni koronavirus infeksiyasini yuqtirib olish bilan bog‘liq 342 ta yangi holat ro‘yxatga olindi — bu kunlik kasallanish ko‘rsatkichi bo‘yicha 2021-yilning eng yuqori ko‘rsatkichidir. Bundan avvalgi antirekord bir kun avval — 16-aprel kuni qayd etilgan, o‘shanda 316 kishida COVID-19 tasdiqlangan edi.

Yangi kasallanish holatlarining:

  • 7 tasi Qoraqalpog‘iston Respublikasida,
  • 3 tasi Andijon viloyatida,
  • 10 tasi Buxoro viloyatida,
  • 8 tasi Jizzax viloyatida,
  • 2 tasi Navoiy viloyatida,
  • 3 tasi Namangan viloyatida,
  • 29 tasi Samarqand viloyatida,
  • 3 tasi Sirdaryo viloyatida,
  • 1 tasi Surxondaryo viloyatida,
  • 4 tasi Farg‘ona viloyatida,
  • 1 tasi Xorazm viloyatida,
  • 50 tasi Toshkent viloyatida,
  • 221 tasi Toshkent shahrida

koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.

Shunday qilib, Sog‘liqni saqlash vazirligi hisob-kitoblariga ko‘ra, O‘zbekistonda koronavirus infeksiyasiga chalingan rasman tasdiqlangan shaxslar soni 86 680 nafarga yetgan. Ulardan 205 nafari (Qoraqalpog‘istonda 6 nafar, Buxoro viloyatida 8 nafar, Namangan viloyatida 5 nafar, Samarqand viloyatida 22 nafar, Farg‘ona viloyatida 2 nafar, Toshkent viloyatida 37 nafar, Toshkent shahrida 125 nafar) sog‘aygan. Jami sog‘ayganlar soni 84 043 nafar, sog‘ayish ko‘rsatkichi — 97 foiz.

Sog‘liqni saqlash vazirligi ma’lumotlariga ko‘ra, 17-aprel yakunlariga ko‘ra koronavirusga chalinib, vafot etgan ikki kishi COVID-19 ning O‘zbekistondagi qurbonlari ro‘yxatiga qo‘shilgan (ushbu marhumlar aynan qaysi sanada vafot etgani ma’lum qilinmagan), rasmiy statistika bo‘yicha O‘zbekistonda koronavirus infeksiyasi asoratlari oqibatida vafot etganlar soni 638 nafarga yetgan (“Daryo” nashri 2020-yil 22-sentabrga qadar yuritgan alohida statistika bo‘yicha, qurbonlar soni kamida 19 nafarga ko‘p).

Vazirlikning alohida qayd etishicha, “ayni paytda tibbiyot muassasalarida davolanayotgan 1999 nafar bemordan 238 nafari og‘ir, 109 nafari esa o‘ta og‘ir ahvolda”.