“Daryo”ni Telegram’da o‘qing! Join!
12:33, 17.04.2021 12577

O‘zbekistonga aprel oxiriga qadar yana 1 mln dona Xitoy va 300 ming dona “Sputnik V” vaksinalari olib kelinadi

O‘zbekistonga aprel oxiriga qadar yana 1 million dona Xitoy vaksinasi olib kelinadi. Bu haqda Abdulla Aripov koronavirusga qarshi kurash komissiyasining kengaytirilgan yig‘ilishida ma’lum qildi, deb xabar beradi “Daryo” muxbiri.

Foto: “Daryo” / Madina Nurman

“O‘tgan kuz mavsumida 1,2 million kishini grippga qarshi emlagan edik, bu juda katta effekt berdi. Joriy mavsumda Prezident buni 1,6 million kishiga yetkazish bo‘yicha topshiriq berdi.

Kasallik aniqlangan hollarda bemor bilan muloqotda bo‘lganlar bilan ishlash tizimini kuchaytirish, birlamchi tibbiy bo‘g‘in masalalari tomonidan karantinga olingan fuqarolar va ularning oila a’zolarining kunlik tibbiy nazoratini Sog‘liqni saqlash vazirligi, mahalliy idoralar bilan kuchaytirish kerak.

Uy sharoitida davolanayotgan bemorlar va karantinga olingan shaxslarga tibbiy maslahat berishga qaratilgan Call-markaz faoliyatini qayta yo‘lga qo‘yish kerak”, — deydi Abdulla Aripov.

Shuningdek, bosh vazir viloyatlar zaruriy tibbiyot va dori-darmon vositalari zaxiralarini yaratishiga ham alohida to‘xtalib o‘tgan.

“Faqat Toshkent shahri, Xorazm viloyati, qisman Samarqand va Qashqadaryo viloyatlari bu talabni bajardi (dori-darmon zaxirasi — tahr). Qolganlar davlat zaxirasi bor-ku, deb yuribdi.

Abdulla Aripov bosh vazir o‘rinbosari Behzod Musayevga bir haftadan keyin hududlarga vakillarni chiqarib, zaxira yaratilganini tekshirish topshirig‘ini berdi. Qoraqalpog‘iston Respublikasi Vazirlar Kengashi, Toshkent shahar hokimi va viloyat hokimlariga poliklinika va oilaviy shifokorlik punktlari qoshida mobil brigadalarni qayta tashkil etish va ularni maxsus avtotransport vositalari bilan ta’minlash vazifasi qo‘yildi.

Bosh vazirning aytishicha, aprel oxiriga qadar 300 ming dona “Sputnik V” hamda 1 million dona Xitoy vaksinalari olib kelinadi. Bu bo‘yicha shartnoma imzolangan, puli to‘langan, hatto reyslari hal etilgan.

Eslatib o‘tamiz, aholini koronavirusga qarshi emlash tadbirlari 1-apreldan viloyatlar markazlari va katta shaharlardan boshlandi. May oyida emlash tadbirlari tuman markazlari va kichik shaharlarda amalga oshiriladi. Iyun oyida esa boshqa aholi qatlami emlanadi.

O‘zbekistonda bugungi kunda 1 million 660 ming doza vaksina bor. Ularning 660 ming dozasi COVAX jamg‘armasi tomonidan olib kelingan AstraZeneca vaksinasi, 1 million dozasi — O‘zbekiston—Xitoy hamkorligida ishlab chiqilgan ZF-UZ-VAC 2001 vaksinasi.

Boshqa yangiliklar