“Mening ahvolim sal og‘irroq, Tojibar opangizniki ancha yaxshi”. Mirza Azizovning kovid-kasalxonada davolanayotgan paytda yuborgan audiosi tarqaldi

O‘zbekiston xalq artisti Mirza Azizov 16-aprel, juma kuni 58 yoshida vafot etdi. Ijtimoiy tarmoqlarda  Mirza Azizovning kasalxonada davolanayotgan paytdagi audiosi tarqaldi. Ovozli xabarda taniqli aktyor Zangiotadagi kasalxonada oilaviy yotganini, ahvoli og‘ir ekanligini aytadi.

Ijtimoiy tarmoqlarda Mirza Azizovning rafiqasi Tojibar Azizova ham hozirda koronavirusdan davolanayotgani haqida aytilmoqda.

“Assalomu alaykum, Rohilaxon, yaxshimisiz, qizim, charchamasdan yuribsizmi? Biz oilaviy kovid bo‘lib, Zangiotaga tushib qoldik. Hammamiz oilaviy yotibmiz. Men sal og‘irroqman, Tojibar opangiz ancha yaxshi”, — deydi aktyor ovozli xabarda.

Shuningdek, Qirg‘izistonda xizmat ko‘rsatgan artist Samara Karimova Mirza Azizov bilan oxirgi yozishmasi skrinshotini e’lon qildi. Mirza Azizov 3-aprel kuni xonandaga “Menda og‘irroq o‘tyapti, sekin-sekin yaxshi bo‘lyapman”, deb yozgan.

“Milliy” telekanalining “M-kokteyl” ko‘rsatuvida Mirza Azizovning koronavirus oqibatida vafot etgani aytildi. Ko‘rsatuvda Mirza Azizovning “Bolalarim, kelinlarim, turmush o‘rtog‘imni qiynab, yillab bir joyda yotib qolmay deyman. Ko‘p yashashni hamma xohlaydi, lekin Xudo qancha umr bergan bo‘lsa, uni mazmunli, yaxshilar davrasida o‘tkazay, deyman”, — degani aks etgan lavha ham namoyish etildi.