Buxoroda IIB xodimlari ehtiyotsizligi oqibatida avtomashinasi bilan ag‘darilib, suvda oqib ketayotgan nogiron haydovchini qutqardi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, 16-aprel, juma kuni soat 17:00 larda Matiz rusumli davlat raqami 80 A 508 QA bo‘lgan avtomashina haydovchisi ehtiyotsizligi sabab Buxoro shahridagi “Gulchorbog‘” mahallasidan oqib o‘tuvchi kanalga mashinasi bilan ag‘darilib tushgan.
Xuddi shu payt Buxoro shahar 4-son IIB ma’muriy hududida xizmat olib borayotgan, Buxoro viloyat IIB, Patrul-post xizmati va jamoat tartibini saqlash boshqarmasi, PPX batalyoni 3-otryad haydovchi xodimi, safdor Ahmadjon Saidov voqeaga guvoh bo‘lgan. U o‘zining hamrohi bo‘lgan ushbu batalyon 4-otryad xodimi, safdor Nodirbek Abdullayev bilan yordamga oshiqqan va o‘zini suvga tashlagan. Suvda oqayotgan haydovchining hayotini qutqarib qolib, avtomashinani suvdan chiqarish choralarini ko‘rgan.
Hayoti qutqarib qolingan haydovchining shaxsiga oydinlik kiritilganda, u 1983-yilda tug‘ilgan, Buxoro shahrida istiqomat qiluvchi, ikkinchi guruh nogironi Komil Rahmatov ekani ma’lum bo‘lgan.
Izoh (0)