Bitkoin asoschisi dunyoning eng boy odamlari qatoriga qo‘shildi

Bitkoinning anonim asoschisi dunyoning eng boy odamlaridan biriga aylandi. Bu haqda Tengrinews xabar berdi.

Turli hisob-kitoblarga ko‘ra, 750 mingdan 1,1 milliongacha kriptovalyuta tangalariga egalik qiluvchi, Satosi Nakamoto taxallusi bilan tanilgan bitkoin asoschisining boyligi 61 milliard dollarga yetdi.

Forbes reytingiga ko‘ra, Maykl Blumberg, Rob va Jim Uoltonlarni ortda qoldirgan Nakamoto dunyoning 20 nafar eng boy odamlari ro‘yxatiga kirdi.

Muammo shundaki, Satosi Nakamotoning kimligini hech kim bilmaydi. Bu nom bitkoin kriptovalyutasining protokolini ishlab chiqqan va dasturiy ta’minotning birinchi versiyasini yaratgan odamning yoki guruhning taxallusi.

Ushbu nom ortida turgan haqiqiy shaxsni yoki guruhni aniqlashga bir necha bor urinishlar bo‘lgan. Lekin ularning hech biri natija bermagan. Faqatgina Nakamoto dunyodagi bitkoinlarning besh foiziga egalik qilishi ma’lum.

Qiymati birinchi marta 64 ming dollardan oshib, tarixiy rekordni yangilaganidan so‘ng bitkoinning narxi o‘sishda davom etmoqda.

3-mart kungi savdolar chog‘ida bitkoin narxi birinchi marta 60 ming dollardan oshgan edi. 2-yanvar kuni bitkoin kursi 32 ming dollarlik chegaradan o‘tib, savdo sessiyasi davomida bitkoin qiymati 32 700 dollarni tashkil etgan. Dekabr o‘rtalarida bitkoin narxi 5 ming dollarga oshgan edi. 16-dekabr kuni kriptovalyuta qiymati birinchi bor bir sutkada 12 foizga qimmatlashib, 20 minglik chegaradan o‘tib ketgan. 21-dekabr kuni bitkoin kursi 24 ming dollardan oshgan, keyingi bir necha kun davomida esa 24,6 ming dollarlik oraliqda saqlangan. 26-dekabr kuni esa bitkoin narxi birinchi bor 25 ming dollardan oshib ketgandi.