Yaponiyaning Sony kompaniyasi Snapdragon 888 protsessori o‘rnatilgan uchinchi avlod flagmani Xperia 1 III modelini taqdim etdi, deb xabar beradi “Korrespondent.net”.

Foto: Twitter / Sony365official

Yangi flagmanning dizayni o‘zida oldingi avlodnikiga o‘xshash: tomonlar nisbati 21:9 bo‘lgan “kinematografik” cho‘zilgan ekran va to‘g‘ri burchakli korpus. Xperia 1 III modeliga 4K sifatni qo‘llab-quvvatlaydigan va 120 gertsli tasvir yangilanish chastotasiga ega 6,5 dyuymli AMOLED-matritsa o‘rnatilgan. Shuningdek, ekranda Corning Gorilla Glass himoya shishasi mavjud.

Smartfon ichiga 5G-modemi integratsiyalashgan Qualcomm Snapdragon 888 platformasi o‘rnatilgan. Tezkor xotirasi — 12 gigabayt, shuningdek, 256 gigabaytli ichki xotira ham mavjud. Ta’kidlanishicha, Xperia 1 III xotira kartasi va audiojekka ega slotli dunyodagi yagona smartfon hisoblanadi.

Smartfonning kameralar moduli to‘rtta sensordan iborat: uchta 12 megapikselli (Exmor RS) va bitta 3D ToF. Xperia 1 III modeli Photohraphy Pro funksiyasini qo‘llab-quvvatlaydi.

Kompaniya sig‘imi 4500 mA/soatga teng akkumulyator 3 yilgacha ishlashiga va’da bermoqda. Smartfonning ikkita quvvatlantirgichi bor: 30 vattli simli va simsiz. Gadjet narxi 1290 dollarni tashkil etadi.

Eslatib o‘tamiz, Sony kompaniyasi 5G’ni qo‘llab-quvvatlovchi Xperia 1 II flagmanini 2020-yilning fevralida taqdim etgandi.