Germaniya kansleri Angela Merkel mamlakatning vaksinatsiya jarayoni muvaffaqiyatli kechayotganini va “tunnel oxiridagi yorug‘lik”ka yaqinlashayotganini ta’kidladi, deb yozmoqda “RIA Novosti”.
“Bunda bizga bir narsa katta yordam beryapti. Biz cheklovlarni qayta kiritayotgan paytda vaksinatsiya kampaniyasi o‘z ishini davom ettirib, kundan kunga yaxshiroq natijalarga erishyapti va minglab aholi koronavirusga qarshi ishonchli himoyaga ega bo‘lyapti. Vaksinatsiya kampaniyasiga terapevt-shifokorlar jalb qilingan va tez orada xususiy klinikalarning mutaxassislari ham qo‘shiladi. Biz tunnel oxiridagi yorug‘likka katta qadamlar bilan boryapmiz”, — dedi Merkel matbuot anjumanida.
Ma’lumot uchun, Germaniya kansleri Angela Merkel mamlakatda karantin 18-aprelgacha uzaytirilganini ma’lum qilgan edi.
Germaniya Sog‘liqni saqlash vazirligining ma’lumot berishicha, 12-aprel holatiga ko‘ra, mamlakatning 16,3 foiz aholisi (13,5 million kishi) vaksinaning birinchi dozasini olib bo‘ldi, 6,2 foizi esa (5,1 million kishi) to‘liq emlandi.
Germaniyada 12-aprel kuni 400 ming kishi virusga qarshi emlangan bo‘lsa, 8-aprel kuni mamlakat uchun rekord darajada — 723 mingta vaksinatsiya amalga oshirildi. Hozircha mamlakatda foydalanilayotgan barcha preparatlar ikkita dozadan iborat.
Avvalroq Germaniya prezidenti Frank-Valter Shtaynmayer aholini Pasxa bayrami bilan tabriklab, chiqish qildi va ularni koronavirus pandemiyasi sababli qat’iy choralar ko‘rishga chaqirdi. Shtaynmayerning so‘zlariga ko‘ra, pandemiyani bartaraf etish uchun ko‘p choralar ko‘rildi, lekin “sinovlarda, vaksinatsiyada, raqamli yechimlar masalasida” xatolarga ham yo‘l qo‘yildi.
Shuningdek, Germaniya sog‘liqni saqlash vazirligi 15-mart kuni ehtiyot chorasi sifatida AstraZeneca vaksinasi bilan odamlarni emlash ishlari vaqtincha to‘xtatib turilganini xabar qildi. “Germaniya Federativ Respublikasi hukumati Paul Erlix nomidagi institut tavsiyalariga amal qilishni lozim deb topdi”, — deyilgan vazirlik bayonotida.
Ma’lumot uchun, Jahon sog‘liqni saqlash tashkiloti (JSST) rahbari Tedros Gebreyesus dunyoda koronavirus bilan kasallanish holatlarining ko‘paygani ketma-ket yettinchi hafta kuzatilganini ma’lum qildi.
Izoh (0)