AQSh Afg‘onistondan o‘z qo‘shinlarini 11-sentabrgacha olib chiqadi. Uning ketidan Britaniya ham harbiylarini olib ketadi

AQSh Afg‘onistondan o‘z harbiylarini olib chiqish muddatini qayta ko‘rib chiqdi, deb xabar berdi prezident ma’muriyatining vakili. Uning so‘zlariga ko‘ra, amerikalik harbiylar mintaqani 11-sentabrgacha tark etadi. 2020-yilning oxiriga kelib Afg‘onistonda Amerikaning 8,6 ming harbiy xizmatchisi qolgan edi.

“Qolgan qo‘shinlarni tartibli ravishda 1-mayga qadar olib chiqishni boshlaymiz va 11-sentabr, Amerika qo‘shinlari Afg’onistonga kirganining 20 yilligi sanasiga qadar barcha harbiylarni mamlakatdan olib chiqishni rejalashtiryapmiz”, — dedi prezident ma’muriyatining vakili jurnalistlarga.

Uning qo‘shimcha qilishicha, qo‘shinlar hududdan olib chiqilayotganda hujumga uchragan taqdirda, AQSh harbiylari “kuchli javob” qaytaradi. “Biz (mintaqada) terrorizm xavfini kuzatishni to‘xtatmaymiz... Afg‘oniston terrorchilarning AQShga qarshi hujumlarini tayyorlashi mumkin bo‘lgan bazasiga aylanishiga yo‘l qo‘ymaslik uchun tinimsiz ishlashda davom etamiz”, — deb ta’kidladi u.

Ma’lumot uchun, 2020-yilning fevral oyida AQSh va “Tolibon” o‘rtasida tinchlik shartnomasi imzolangan edi. Shartnoma AQSh harbiylarini 2021-yilning 1-mayiga qadar Afg‘onistondan bosqichma-bosqich olib chiqish, mahbuslarni ozod qilish va yangi hukumat tuzishni ko‘zda tutgan.

Oq uyning yangi ma’muriyati esa harbiylarni olib chiqish muddatini qayta ko‘rib chiqish rejasini e’lon qildi.

“Harbiylarni u yerda uzoq ushlab turmoqchi emasman... U yerdan ketamiz, lekin qachonligi noma’lum”, — dedi Bayden. AQSh harbiylari Afg‘onistonda keyingi yilgacha qolishi mumkinmi, degan savolga javoban Bayden “bunday bo‘lishini tasavvur qila olmasligi”ni aytdi.

The Times gazetasining yozishicha, Buyuk Britaniya ham deyarli barcha qo‘shinlarini Afg‘oniston hududidan olib chiqishni rejalashtiryapti.

Ma’lumotlarga ko‘ra, bugungi kunda Afg‘onistonda 750 ming britaniyalik harbiy bor. Shu bilan birga, Buyuk Britaniya armiyasi amerikaliklarning bazalari va infratuzilmasidan foydalanib kelgani sababli AQSh qo‘shinlarining olib chiqilganidan keyin britaniyaliklarning qiyinchiliklarga duch kelishi ehtimoli bor. Shuningdek, Buyuk Britaniya harbiylari mahalliy askarlar bilan mashg‘ulot o‘tkazadigan Kobul akademiyasining nazorati ham Afg‘oniston hukumatiga topshirilishi mumkin.

Bayden ma’muriyatining bunday qaroriga javoban, “Tolibon” Afg‘onistondagi chet el harbiylariga qarshi hujumlarni qayta boshlash bilan tahdid qildi va ularning barchasi belgilangan muddatda Afg‘onistonni tark etmasa, “toliblar” yana “vatanini ozod qilish uchun, jihodni va chet el harbiylariga qarshi qurolli kurashlarni davom ettirishga majbur” bo‘lishini ta’kidladi. Shuningdek, bu talablar bajarilmaguncha, “Tolibon” delegatsiyasi hech qanday konferensiyada ishtirok etmasligini ma’lum qildi.