Gollivudning taniqli aktyori Dueyn Jonson o‘zining Instagram’dagi sahifasi orqali AQSh prezidenti bo‘lish kabi imkoniyat tug‘ilsa, bundan faxrlanishini yozib qoldirdi.
“Asoschi-otalarimiz ikki metrli, kal, tatuirovkalar tushirilgan, yarimi qora, yarmi samoalik bo‘lgan, tekila ichadigan, bananka taqib olib pikapni boshqaradigan yigit o‘zlarining klubiga qo‘shilishini tasavvur qilgan deb o‘ylamayman, ammo bu qachondir sodir bo‘lsa, sizlarga, insonlarga xizmat qilish men uchun sharaf bo‘ladi”, — deydi aktyor.
Shuningdek, Jonson Newsweek nashrining agarda u saylovlarda ishtirok etsa, Piplsay kompaniyasi so‘roviga ko‘ra, 46 foiz aholi ovoz berishga tayyorligi to‘g‘risidagi yangilikka ham munosabat bildirgan. Bundan tashqari, saylovchilar AQSh prezidenti lavozimida Anjelina Joli, Opra Uinfri va Tom Xenksni ham ko‘rishni istagan.
“Klub”ga 2020-yilda reper Kanye Uest ham qo‘shilishni istagan, biroq u mavjud 160 million ovozdan 60 mingini to‘play olgan, xolos.
Avvalroq yana bir taniqli aktyor Mettyu MakKonaxi siyosatga kirmoqchi ekani va 2022-yili Texasdagi gubernatorlik saylovlarida qatnashish niyati borligini ma’lum qilgandi.
Izoh (0)