Qashqadaryoda maktab direktori o‘rinbosarining o‘g‘liga ikki baho qo‘ygan ingliz tili o‘qituvchisi kaltaklangandi. Ushbu holat yuzasidan Qashqadaryo viloyati IIB axborot xizmati munosabat bildirdi.
Qayd etilishicha, 2021-yil 6-aprel kuni Chiroqchi tuman IIO FMB navbatchilik qismiga kelib tushgan xabarga ko‘ra, shu kuni tumandagi 134-sonli umumiy o‘rta ta’lim maktabining ingliz tili fani o‘qituvchisi Shoxnur Oqqo‘ziyev o‘zining fanidan shu maktab o‘quvchisi M.O.ga ikki baho qo‘ygani sababli, maktab o‘quvchisi M.O. ushbu holatni akasi X.B.ga aytgan. X.B. shu kuni soat 12:00 larda ikkita tanishi bilan maktabga kelib, ingliz tili fani o‘qituvchisi Shoxnur Oqqo‘ziyevning harakatidan norozi bo‘lib, maktab hududida unga tan jarohati yetkazgan.
Mazkur holat tuman IIO FMB navbatchilik qismidan belgilangan tartibda qayd etilib, tegishli hujjatlar rasmiylashtirilgan.
Hozirgi kunda mazkur holat yuzasidan Chiroqchi tuman IIO FMB huzuridagi tergov bo‘limi tomonidan tergovga qadar tekshirish harakatlari olib borilmoqda.
Bundan avval Namanganda zamonaviy klinika qurish uchun qishloq vrachlik punkti binosini bo‘shatishni so‘ragan shaxslar ikki bemor tomonidan kaltaklangani, Surxondaryoda bolalarga qo‘pol munosabatda bo‘lgan tarbiyachi ishdan bo‘shatilgani hamda Toshkentda mast erkak shifokor ayolni kaltaklab, jiddiy jarohat yetkazgani haqida xabar berilgandi.
Izoh (0)