O‘zbekiston Prezidentining “Kino san’ati va sanoatini yangi bosqichga olib chiqish, sohani davlat tomonidan qo‘llab-quvvatlash tizimini yanada takomillashtirish to‘g‘risida”gi farmoni bilan kinoteatrlar tarmog‘ini rivojlantirish tartibi tasdiqlandi, deb xabar beradi O‘zA.
Unga ko‘ra, Qoraqalpog‘iston Respublikasi va viloyatlarning har bir tumanida (shahrida) tarkibida jami o‘rindiqlar soni 250 tadan va kinozallari soni 3 tadan kam bo‘lmagan savdo-ko‘ngilochar komplekslarini qurish uchun tadbirkorlik subyektlariga qishloq xo‘jaligiga mo‘ljallanmagan 25 sotix yer maydonlari bepul ajratiladi.
2021-yil 1-iyuldan boshlab yangi quriladigan savdo maydoni 15 ming kvadrat metrdan ortiq savdo-ko‘ngilochar komplekslarida jami o‘rindiqlar soni 300 tadan va kinozallari soni 4 tadan kam bo‘lmagan kinoteatr tashkil etish majburiy hisoblanadi.
Yangi tashkil etilgan kinoteatrlarga ular faoliyatining dastlabki uch oyi davomida Kinematografiya agentligi buyurtmasi asosida ishlab chiqarilgan milliy filmlar bepul yetkazib beriladi.
Viloyatlar hokimliklariga 2021-yil 1-iyunga qadar har bir tuman markazlarida bitta, shahar markazlarida ikkita kinoteatrlari mavjud savdo-ko‘ngilochar komplekslari tashkil etish uchun yer maydonlarini ajratish, 15-iyulga qadar ajratilgan yer maydonlariga investorlarni jalb etish uchun ochiq tanlov o‘tkazish va g‘oliblarni aniqlash majburiyati yuklangan.
2021-yil 1-dekabrga qadar filmlarga nisbatan mualliflik huquqi va sotilgan har bir chiptaga doir haqqoniy ma’lumot bilan tezkor ta’minlovchi respublikada faoliyat yuritayotgan kinoteatrlar faoliyatini avtomatlashtirishga qaratilgan axborot tizimining ishlab chiqish, 2022-yil 1-mayga qadar axborot tizimini to‘liq sinovdan o‘tkazish rejalashtirilgan.
Izoh (0)